Vështirë në Chelsea

Sulmuesi i Chelseas, Fernando Torres ka pranuar se ka hasur në vështirësi për tu adaptuar në Stamford Bridge. Spanjolli iu bashkua gjigantit londinez nga Liverpool në janar për 50 milionë funte por deri më tani nuk e ka arsyetuar çmimin e lartë të paguar për të.

Torres ka shënuar vetëm tre gola në ligë prej debutimit të tij kundër Liverpoolit në shkurt. Në deklaratat e transmetuara nga Esquire Espana, Torres ka pranuar se ishte adaptuar më lehtë në Anfield.

“Nuk ka ngjashmëri, e kaluara e as e tashmja. Procesi i adaptimit për secilin ka qenë i ndryshëm. Chelsea është në Londër, një qytet i madh. Unë erdha nga Madridi, po ashtu një kryeqytet i madh evropian” tha Torres. “Ka qenë më e vështirë të adaptohem këtu për dallim nga koha kur erdha në Liverpool, një vend më i rehatshëm, më i vogël dhe isha i rrethuar nga bashkëlojtarët e Kombëtares. Në fund, gjëja më e rëndësishme është të mundoheni të organizoni vetën sa më shpejt që është e mundur. Këtë jam duke e bërë tani” shtoi ai.

27 vjeçari po ashtu përshkroi çmimin e tij prej 50 milionë funtesh si “vetëm një numër” dhe pranoi se largimi i Xabi Alonsos nga Anfield ishte njëra prej arsyeve primare për transferimin e tij në Chelsea.