Vetëvendosje do t'i bashkohet protestës të së shtunës

Kryetari i Grupit Parlamentar të Lëvizjes Vetëvendosje, Visar Ymeri ka thënë se kjo lëvizje do t'i bashkohet protestës te së shtunës, e cila organizohet nga shoqëria civile.

“Lëvizja Vetëvendosje është vetëm një prej zërave që është ngritur për të kundërshtuar këto negociata, një numër i konsiderueshëm i shoqërisë civile janë mobiluar për të protestuar në Prishtinë në ditën e shtunë një protestë paqësore kundër këtyre negociatave dhe kundër këtij shteti policor. Deputet dhe aktivistë të Lëvizjes Vetëvendosje do të i përgjigjen kësaj thirrje nga shoqëria civile dhe do të i bashkohemi me protestuesit në shesh”, ka theksuar Ymeri.

Për më tepër ai i ka bërë thirrje të gjithë deputetëve që të i bashkohen kësaj proteste.

Nënkryetari i Kuvendit të Kosovës dhe njëherësh kryesuesi i seancës së sotme, Xhavit Haliti, ka kritikuar kërkesat e deputetëve për protesta.

Vetëvendosje ka protestuar, ditë më parë, edhe takimin në mes të kryeministrit kosovar, Hashim Thaçi, dhe homologut të tij serb, Ivica Daçiq.