Vidhet për herë të 4 kablloja në Zvërnec

 

VLORE - Vidhet për herë të katërt kablloja elektrike në zonën e Zvërnecit. Pasi u zëvendësua katër herë, autorët e kanë vjedhur atë çuditërisht në të njëjtin vend. E gjithë zona e plazhit të Zvërnecit dhe Triportit kanë mbetur pa energji elektrike. Ndërsa qyteti i Vlorës ashtu sikurse edhe në precedentët e mëparshëm, ka mbetur pa sinjal televiziv. Edhe pse policia kishte marrë masa për ruajtjen e linjës elektrike që furnizon me energji zonën e  Zvërnecit, autorët të cilët ende nuk janë identifikuar kanë arritur ta vjedhin sërish. Sipas burimeve pranë OSSH-së, janë rreth 150 metra kabull që janë shkëputur gjatë natës. “Vjedhja e linjës kabllore ka lënë pa energji të gjithë zonën e Zvërnecit, Nartës, një pjesë të zonës së Panajasë, si dhe pa furnizuar me energji elektrike të gjitha antenat televizive kombëtare dhe lokale, duke lënë pa sinjal të gjithë qytetin e Vlorës dhe më tej”, u shprehën burime pranë OSSH. Policia e Vlorës ende nuk ka mundur të identifikojë autorët e vjedhjes së përsëritur. Mësohet se punonjësit e OSSH-së kanë nisur punën për zëvendësimin e pjesës së kabllos që mungon, por zyrtarët e këtij institucioni shprehen të pakënaqur me punën e deritanishme të policisë. Sipas tyre, është hera e katërt që ndodh i njëjti skenar, në të njëjtin vend, ndërsa policia nuk arrin jo vetëm t’i ndalojë, por as t’i identifikojë vjedhësit. Dëmi që po i shkaktohet OSSH-së është mjaft i madh, shprehen drejtuesit e kësaj ndërmarrje. Shumë pushues të zonave që kanë mbetur pa drita kanë nisur që ditën e djeshme të braktisin zonën. Banorët e Zvërnecit, por dhe të Nartës janë shprehur me dyshime se për vjedhjen e linjës për të disatën herë mund të kenë dorë ndoshta edhe punonjës të elektrikut. Ata arrijnë ta shkëpusin kabllon në kohën që është në tension.                     q.b