Vizitë dyditore në Tiranë e Ministrit të Punëve të Jashtme të Republikës Popullore të Kinës

Me ftesë të Zëvendëskryeministrit dhe Ministrit të Punëve të Jashtme të Shqipërisë, Edmond Haxhinasto, mbërrin sot për një vizitë zyrtare dy ditore në Shqipëri, ministri i Punëve të Jashtme i Republikës Popullore të Kinës, Yang Jiechi. Tirana është vendqëndrimi i parë në turin e tij në Europë dhe Afrikë, njoftuan dje burime të ministrisë shqiptare të Punëve të Jashtme. Sipas këtyre burimeve, vizita e Jiechi bëhet në prag të 40- vjetorit të ripranimit të Republikës Popullore të Kinës në OKB, ngjarje për të cilën Kina vazhdon të vlerësojë kontributin e madh të Shqipërisë. Qëllimi i vizitës së Jiechit është forcimi i marrëdhënieve miqësore dhe bashkëpunimi ekonomik, për të sjellë një dinamikë të re në lidhjet mes dy popujve. Jiechi do të pritet fillimisht nga Zëvendëskryeministri dhe Ministri i Punëve të Jashtme, z. Haxhinasto dhe pas takimit  do të ketë një konferencë për shtyp në mjediset e MPJ ku do të nënshkruhet edhe një marrëveshje bashkëpunimi në fushën e turizmit, ndërmjet Ministrisë së Turizmit, Kulturës,Rinisë dhe Sporteve tё Republikës së Shqipërisë dhe Administratës Kombëtare të Turizmit të Republikës Popullore të Kinës për vitet 2011 – 2013. Sipas burimeve të ministrisë së Jashtme, Ministri i jashtëm kinez do të pritet më 4 gusht në takime të veçanta edhe nga  Kryeministri  Sali Berisha, Kryetarja e Kuvendit, Jozefina Topalli dhe  Presidenti i Republikës Bamir Topi.