Vjedh 6 milionë euro, Indrit Aliu: Më falsifikuan firmën

Trazhgim Sokolaj

Prokuroria e Tiranës i njofton akuzën të dyshuarit për vjedhjen me anë të mashtrimit të 6 milionë eurove nga 11 tregtarë dhe biznese të ndryshme në Tiranë. Njësia Task Force në Prokurorinë e Tiranës, e cila është duke përfunduar hetimet ndaj të dyshuarit Indrit Aliu, i ka njoftuar atij akuzën në prani të avokatit, pak ditë më parë. Pasi i është bërë e ditur se akuzohet për vjedhje me anë të mashtrimit në shuma të mëdha, Indrit Aliut i është kërkuar të japë deklarime në lidhje me akuzën. Pa hyrë në hollësi në lidhje me akuzën, i dyshuari për vjedhje me anë të mashtrimit në 11 raste, ka pohuar se mandatarkëtimet dhe dokumentet që zotërojnë të paktën gjashtë persona të cilëve ai u ka marrë hua sasi të mëdha parash, janë të falsifikuara. "I pandehuri Indrit Aliu ka pretenduar pas njohjes së akuzës, se është falsifikuar firma e hedhur në emër të tij në mandatet e arkëtimit dhe në faturat e lëshuara për shumat financiare", kanë thënë burimet nga hetimi i çështjes në Prokurorinë e Tiranës. Hetimi ndaj Indrit Aliut filloi një vit më parë, pasi katër persona dhe biznese të ndryshme denoncuan të dyshuarin, në cilësinë e presidentit të kompanisë "Dejs & Partners Consulting". Ndërkohë që Indrit Aliu ishte larguar nga Shqipëria, ndaj tij u depozituan 11 kallëzime penale, nga të cilat 6 u plotësuan me dokumente, që provonin se ai kishte marrë shuma parash dhe vlera materiale nga biznesmenë dhe kompani, në formën e huave të cilat më pas nuk i kishte kthyer. Sipas hetimeve të prokurorisë, shuma më e vogël që i dyshuari ka përfituar në një rast ka qenë 10 mijë euro nga një dyqan celularësh. Ndërkohë në total, dëmi financiar i shkaktuar të dëmtuarve, sipas prokurorisë është rreth 6 milionë euro. Pak muaj më parë, Indrit Aliu, i cili ishte shpallur në kërkim ndërkombëtar, u ekstradua nga Greqia ku mbahej prej muajsh i arrestuar për llogari të Prokurorisë së Tiranës. Pas mbërritjes në Tiranë, prokuroria i ka njoftuar akuzën të dyshuarit, i cili pritet të dalë para gjykatës brenda pak javësh, pasi prokuroria është duke përfunduar hetimet për vjedhjet që dyshohet se janë kryer me anë të mashtrimit nga i pandehuri. Ai u prezantohej të dëmtuarve herë si zyrtar i një ministrie e herë si biznesmen i besueshëm, dhe u premtonte tenderë dhe në këmbim të tyre u kërkonte paradhënie 1-20 për qind të shumës që do të fitonin. Sipas prokurorisë, viktima të të pandehurit kanë rënë shtetasit me iniciale A.B., R.B., S.R., B.N. dhe L.K., me aktivitete të ndryshme biznesi.