Vjen rokada Skënderbeu merr kreun

Nuk kishte fundjavë më të mirë se kjo për Skënderbeun! Përballë një Dinamoje të pamotivuar në kampionat dhe me një “aleat” të jashtëm si Shkumbini, korçarët arrijnë të marrin vendin e parë pas 23 javësh kryesimi të Flamurtarit.

Në kryeqytet është zhvilluar një nga ato ndeshjet që përsa i përket rezultatit, të jep përshtypjen e një përballjeje të luftuar në çdo skaj të fushës (ndryshe nga e shumëpërfolura Dinamo-Skënderbeu 1-3 e fazës së dytë). 5 gola dhe një Dinamo që sulmon fort, sidomos në pjesën e parë, ku godet traversën me Allmuçën dhe detyron mbrojtësin Bici të bëjë një ndërhyrje in-extremis për të hequr topin pak para se të kalonte vijën fatale. E megjithatë, në minutën e 45-të Soza do të “djegë” me shpejtësi mbrojtjen kundërshtare e do të pasojë saktë te Muzaka, që do të mposhtë portierin Hoxha. Ky është i pari nga 5 golat që do të shënohen të tërë nga ish-lojtarë të dy skuadrave.

Pjesa e dytë nisi me golin e Skënderbeut, të realizuar nga Soza në të 46-tën, e që çoi rezultatin 0-2. Edhe Soza është një ish-lojtar i Dinamos. Për argjentinasin bëhet fjalë për golin e 11-të të tij. Dinamo shkurtoi diferencën në 1-2 në minuten e 55-të, me një kundërsulm të nisur nga Allmuça, Shehi nuk e kontrolloi dot topin dhe aty Mlladen Brkiç realizoi golin ndaj ish-skuadrës së tij, Skënderbeut. Por nuk mbaron me kaq. Në minutën e 60-të, Skënderbeu shënoi golin e tretë me anë të Muzakës. Jetmir Sefa harkoi në zonë, portieri Hoxha nuk arriti ta kontrollojë topin, dhe aty ish-lojtari i bluve, Muzaka, shënoi golin e tij të dytë në këtë ndeshje. Megjjithatë, për t’i vënë kapak sfidës dhe paradës së golave, ka menduar edhe njëherë Mlladen Brkiç. Në minutën e 70-të, serbi shkurtoi diferencën në 3-2, me golin e tij të dytë në këtë ndeshje, ashtu si Muzaka për Skënderbeun. Për sulmuesin bëhet fjalë për golin e tij të 11 sezonal, 8 nga këta për Skënderbeun. Korçarët kanë fituar të treja përballjet me Dinamon në këtë kampionat, 3-2, 3-1, 3-2, duke grumbullar 9 pikë.

Përfundimisht, një fitore me shumë vlera për Skënderbeun, që i mundëson të parakalojë në renditje Flamurtarin, që e lëshon kreun pesë javë para përfundimit të kampionatit.