Vlorë, ndjekje penale për bizneset debitore

Vlorë- Mosshlyerja e detyrimeve dërgon për ndjekje penale 19 subjekte në Vlorë, ndërkohë që për shumë të tjerë po bëhen gati dosjet për procedime.

Sipas burimeve nga zyra e tatimeve në këtë qytet mësohetse neglizhenca ndaj shlyerjes së detyrimeve nuk do të nënkuptojë më vetëm bllokimet, por deri edhe përballje me drejtësinë.

Sipas statistikave, në zyrën e tatimeve janë 300 subjekte fizike që nuk kanë licenca, ndërkohë që afati i licencimit ka kaluar që prej muajit mars. “Me detyrime pranë tatimorëve janë edhe subjekte juridike, në total 110 edhe këto mospaguese të taksave dhe detyrimeve vendore”- thonë burimet pranë kësaj zyre.

Gjithsesi numri jo i paktë i njësive që rezultojnë të parregullt, tashmë do u nënshtrohet penalizimeve. Për 87 subjekte juridikë ka dalë vendimi i bllokimit të llogarive bankare, në shumën që i detyrohen njësisë së vendorit. Për pjesën tjetër po bëhen procedurat përkatëse.

Ligji për procedurat tatimore ka një nen që përcakton edhe veprat penale dhe një ndër to është bërja e evazionit fiskal me dashje, akt ky që klasifikohet te veprat penale.

Subjekte të tillë mësohet se do i kalojnë sektorit juridik dhe pastaj do të shkojnë në prokurori, teksa vijon puna për bllokimin e subjekteve të palicensuara. Për javën në vijim mësohen të jenë bërë gati 35 urdhra bllokimi. Ndër to janë njësi që ushtrojnë aktivitet në tregëti me pakicë, bare, apo lojra fati.