Vlorë, u kërkonin 20 mijë euro biznesmenëve, prangosen

Në pranga kanë rënë shtetasit Nikollaq Syrja Taullaraj, 26-vjeç, lindur në Vlorë dhe banues në Tiranë, i dënuar më parë me tre vjet burg për “shitje të lëndëve narkotike” dhe Ardit Bashkim Alushaj, vjeç 20, lindur dhe banues në fshatin Armen të rrethit të Vlorës. Arrestimi i këtyre shtetasve u bë pasi nga data 21.12.2009 e në vazhdim nëpërmjet telefonatave dhe mesazheve kërcënues kanë kërkuar tu marrin tre biznesmenëve në fushën e ndërtimit në qytetin e Vlorës shumën prej 20.000 euro secilit. Tre biznesmenët kishin bërë kallëzim pranë strukturave të Policisë së Shtetit dhe nga ana e Prokurorisë për Krime të Rënda Tiranë kishte filluar procedimi penal për veprën penale të “Shtrëngimit me anë të kanosjes ose dhunës për dhënien e pasurisë”. Në momentin e arrestimit këtyre personave u janë gjetur dhe sekuestruar me cilësinë e provës materiale dy pistoleta, një krehër fishekësh me 14-(katërmbëdhjetë) copë fishekë, si dhe 5 aparate celular.Pas arrestimit të shtetasve Nikollaq Taullaraj dhe Ardit Alushaj, personat dhe provat materiale, janë vënë në dispozicion të Prokurorisë për Krime të Rënda Tiranë për hetime të mëtejshme.