Vorskla gati rinovimin per Januzin

Ahmet Januzi, sulmuesi i kombëtares kuqezi, i cili ka bërë një paraqitje të mirë gjatë sezonit të fundit në kampionatit ukrainas me Vorskla Poltavën, ka marrë një ofertë nga klubi aktual për rinovimin e kontratës. Drejtuesit ukrainas po insistojnë që ta vazhdojë kontratën me sulmuesin, pasi ajo aktuale skadon në janar 2012. Ai vetë rrëfen se zyrtarët e Vorskla Poltavës po mundohen ta stimulojnë, duke i ofruar kushte akoma më të mira, në mënyrë që ta rinovojë kontratën. “Kontrata ime skadon më 1 janar 2012. Zyrtarët e klubit më kanë ofruar kontratë të re, me kushte shumë më të mira. Por, unë kam kërkuar nga klubi që mos të më bëjnë presion për rinovimin e kontratës. Dua të pushoj, e më pas të mendoj rreth të ardhmes sime. Sigurisht që edhe një vit do të qëndroj aty dhe do t’i përkushtohem vetëm ekipit tim”, - deklaroi Januzi për gazetën kosovare “Express”. Por, ai nuk e mohon se pengesë për një rinovim të mundshëm është fakti se, “më pëlqen të luaj në një ligë më atraktive, si Bundesliga. Kam kontakte me disa klube”.