“Voto tre ligjet, ke garancinë se nuk ka status para 23 qershorit”

Ministrja e Integrimit, Majlinda Bregu thirrje të fundit kreut të PS-së për 3 ligjet

Ministrja e Integrimit, Majlinda Bregu ftoi dje kreun e PS-së, Edi Rama, që të mos pengojë deputetët e opozitës të votojnë tre ligjet e integrimit për t’i dhënë një shans vendit në marrjen e statusit kandidat në BE. “Sot kur Komisioni Evropian nuk do të paraqesë më raport për Shqipërinë, sot kur ke marrë sigurinë se statusi i kandidatit nuk miratohet dot nga BE para zgjedhjeve, sot kur nuk mund të kesh më frikë se përveç reformave madhore, anëtarësimit në NATO e liberalizimit të vizave, kjo qeveri do të hynte në zgjedhje edhe me fitoren e statusit të vendit kandidat, të paktën sot voto tre ligjet”, iu drejtua ministrja Bregu kreut të PS-së përmes një deklarate për shtyp.
Sipas saj, tani na ndajnë vetëm 23 ditë nga mbledhja e radhës e Këshillit të Ministrave të Jashtëm të BE-së, ku do të diskutohet zgjerimi i vendeve të Ballkanit, por fatkeqësisht jo Shqipëria, sepse nuk kemi votuar ende 3 ligjet, që u vunë kusht për integrimin.
Kur kanë mbetur më pak se 8 seanca parlamentare, Bregu i bëri thirrje Edi Ramës ta lejojë opozitën në parlament të votojë 3 ligjet që mbajtën peng statusin për tre vjet. “Edi Rama, bllokove për 3 vjet aspiratën evropiane të shqiptarëve, urdhërove opozitën të bojkotojë e të mos votojë vetëm këto 3 ligje, ndërsa ka votuar gjatë kësaj legjislature, jo pak por plot 133 ligje. Jepu mundësinë deputeteve të tu, që i kanë votuar 133 ligjet, e që ndoshta s’do të jenë më në parlamentin e ri, të mos e mbyllin këtë parlament me turpin e bllokimit të aspiratës së shqiptarëve për integrim”, vijoi Bregu.
Në përfundim, Bregu ftoi sërish kreun e PS-së që të gjejë forcën dhe vullnetin për të hequr dorë nga bllokimi. “Sot humbet edhe më shumë duke këmbëngulur tek bllokimi i votimit të tre ligjeve. Mos mbaj më inate për interesa të ngushta personale, siç ke bërë deri më sot. Voto tre ligjet”, theksoi ministrja Bregu.