"Wrong Number" ose "Gabim me dashje"
Astrit LULUSHI (SHBA)
Tregimi në shqip me titullin në anglisht "Wrong Number", mund të quhej edhe "Gabim me dashje". Faruk Myrtaj trajton aty anën e mirë të gabimeve, të gabimeve pa të keq, të atyre gabimeve që vetëm kur nuk ndodhin, e bëjnë jetën të duket e mërzitëshme, monotone, si një film bardhë-e-zi. "…a thua dashuria qe shndërruar pikërisht në keqardhje? Për më keq akoma, në gjendje të tillë lëngate shpirtërore, më kishte zënë gjumi. Si vulë e trishtë e sundimit të ftohjes polare...'', thotë Myrtaj.
Shkrimtari i ngjan njeriut në fokus. Ai kuptohet nëse e njeh temën që prek e nuk druhet të thotë: "Jam ai që jam." Ky sinqeritet e çliron nga vetja, prandaj edhe nuk mund të rrijë pa shkruar. Madje, kur mendohet se ka arritur cakun, si ai që ende nuk ka gjetur atë që kërkon, shkrimtari kthehet e fillon të ecë kokulur, në të njëjtën rrugë, duke hapur sytë e duke shkelur mbi gjurmët, që e patën sjellë deri aty. Ajo që shkrimtari kërkon është substanca, brendia, e padukshmja që anashkalohet, nuk përfillet, pa të cilën shumë njerëz bëjnë, edhe pse pa të gjithçka duket boshe.
"Wrong Number" mund të kuptohet edhe si rrëfim i gabimeve të vogla, por që ia vlejnë. Gabime të tilla, si gjembi i trëndafilit kur shpon, e bëjnë njeriun të ndjeshëm, të hapë sytë për të parë se diçka të bukur mban në dorë.
"Më përmendi një zile telefoni... M'u deshën pak çaste kthjellimi… Gjithë-gjithë dy a tre miq kishim në këtë qytet të stërmadh. Vendlindja na e gëlltiste jetën në kafe-llafe, por s'kishim pritur një vetmi kaq ngjethëse, si kjo e këtushmja.
Mezi e prisnim zilen e telefonit. Edhe të bërë pa dashje..." (F.M., po aty)
*
"Wrong Number" është sinjal zgjimi, thirrje për shkëputje nga rutina e dalje nga plogështia; thirrje a kujtesë për të shijuar të mirat përreth. Ai gjithashtu krijon imazhin e një skulpture në proçes, ku për hir të formës, guri a druri merr nga artisti goditje të pamëshirëshme. Dhe Myrtaj gdhend guximshëm. Ai shpreh mendimet që njeriu bluan veçanërisht në mërgim, ku punës dhe halleve u shtohet edhe malli.
"Ai që kishte ngatërruar numrin kërkonte ndjesë, pa e ditur se e ndizte për pak minuta zjarrin tek ne. Si kështjellë rëre thërmohej qetësia brenda mureve, kur gabuesi i telefonatës ndodhte i gjuhës mëmë...'' (Wrong Number, F.M.)
Ndjenjat e mendimet mbeten intime, derisa njeriu vendos t'i shprehë. Që të kuptohen ato, duhet të rrjedhin natyrshëm e hapur, dhe Myrtaj nuk ngurron.
"Kalova dorën rreth belit të saj. Të gruas sime. Asnjë shenjë bezdisje. Tek prekja, ndjeva dëshirën e strukur prej mungesës së gjatë... Ajo tjetra (në telefon) vazhdonte të fliste... Absurdi bubullinte: tërë ç'fliste, absolutisht pa lidhje me mua. Por, marrëzisht, ndjehesha mirë." (F.M., po aty)
*
Tregimi "Wrong Number" nuk duhet lexuar pjesë-pjesë. Në brendi të tij vështirë se mund të hyhet me një vështrim a lexim të përciptë. Kjo jo sepse Myrtaj synon të bëhet i lodhshëm, por mendimi i thellë, veçori e shkrimeve të tij, bën që kapërcimi qoftë edhe i një fjalie, të sillte keqkuptim a humbje të fillit të mendimit.
26 Tetor 2008