Yjet që mund të lënë La Ligën

Abidal, Kaka dhe Soldado janë vetëm disa nga yjet që mund të largohen nga La Liga për ta gjetur një angazhim tjetër. Afati kalimtar i janarit fillon vetëm pas disa ditësh, ndërsa në Spanjë, ashtu edhe në ligat e tjera evropiane, priten lëvizje gjigante të futbollistëve, që kanë vendosur t’i lënë klubet aktuale, për arsye të ndryshme.

Afati kalimtar i janarit do të fillojë shumë shpejt. 2012-shi është vetëm disa ditë përpara nesh, kështu që yjet e futbollit spanjoll po mendojnë që ta ndërrojnë mjedisin. Edhe pse gjithmonë është më i varfër se afati kalimtar veror, afati i janarit di të jetë i papërshkrueshëm.

Dhe, si zakonisht, uebfaqja Goal.com e ka publikuar listën e futbollistëve që mund të largohen nga kampionati spanjoll gjatë dimrit, për arsye të ndryshme. I pari nga ta është Leite Kaka. Mesfushori 29 vjeç nuk ka bindur kurrë në Real Madrid. Ai e riktheu formën në fillim të këtij sezoni, por më pas sërish iu kthye ‘folesë’ së vjetër, bankinës.

Arsenali, Tottenhami, Chelsea, Milani dhe Interi, janë të interesuar për shërbimet e përfaqësuesit brazilian, i cili do të vendos së bashku me babanë e tij nëse do t’i bëjë valixhet gati qysh në janar. Një gjë është e sigurt, Kaka nuk konsiderohet i pashitshëm nga klubi mbretëror spanjoll.

Një tjetër futbollist i njohur që mund të lëvizë nga La Liga është edhe Eric Abidal. Kontrata e mbrojtësit francez me Barcelonën skadon gjatë verës që vjen, kështu që klubi katalunas mund të vendos që ta shesë në janar, për të mos e humbur pa para gjatë verës.

32-vjeçari e ka përsëritur shpesh dëshirën për të mbetur në Camp Nou, por sa vijnë e shkojnë ditët, mundësitë e largimit të tij shtohen. Interesim për shërbimet e mbrojtësit të majtë kanë shfaqur PSG, Milan dhe Manchester City.

Edhe Roberto Soldado mund të mendojë të largohet nga Valencia gjatë dimrit. 26-vjeçari e mbylli këtë vit në një formë të shkëlqyeshme, ndërsa u bë objektiv i dy skuadrave angleze, Liverpool e Tottenham, si dhe i asaj franceze PSG. Soldado më parë kishte luajtur në Real Madrid, por ai e gjeti formën më të mirë në Valencia, ku ka realizuar 11 gola vetëm këtë sezon.

Edhe Villarreali mund të mbetet keq në janar. Pas Giuseppe Rossit, i cili ishte lënduar kohë më parë, ‘Nëndetësja e verdhë’ mund të mbetet edhe pa sulmuesin tjetër të rëndësishëm, Nilmar. Për 27-vjeçarin, interesim kanë shfaqur Roma, Fiorentina dhe Sao Paolo. Gjasat janë goxha të mëdha që ai të largohet nga Villarreali gjatë janarit.

Ndër futbollistët e njohur që luajnë në Spanjë e që mund të largohen gjatë dimrit përmendet edhe Diego Buonanotte, i cili mund ta lërë Malagan, për të shkuar në ndonjë klub tjetër evropian.

Po ashtu, edhe mbrojtësi Ricardo Costa i Valencias mund ta ndërrojë mjedisin, për të shkuar në Benficë, por nuk përjashtohet mundësia që të mbetet edhe në Spanjë, me Real Madridin dhe Betisin që po e kërkojnë.

Goal.com shkruan se ekipin mund ta ndërrojë edhe portieri i Espanyolit, Carlos Cameni. 27-vjeçari kërkohet nga klubet angleze Fulham dhe Tottenham, por edhe nga Malaga në Spanjë.