Zhduket Ibrahim Hoxha personi që denoncoi gjykatësin për korrupsion

 

TIRANE - Prej një javë qytetari Ibrahim Hoxha, i cili depozitoi kallëzimin penal ndaj gjyqtarit të Elbasanit Qani Hasa rezulton i zhdukur. Lajmin e pohojnë burime pranë hetimit të kësaj çështjeje, sipas të cilëve ndaj Hoxhës është ngritur akuza e “korrupsionit aktiv”. Sipas prokurorisë, ky është personi që i ka ofruar paratë gjykatësit Hasa për të përfituar një dënim më të lehtë për të afërmin e tij Geron Ocka. Por ndryshe nga çfarë priste, Hoxha është zhgënjyer dhe ka paditur në prokurori. Për më tepërt organi i akuzës pretendon se disponon një CD me materiale audio dhe video, që në fakt janë përgjime që i janë bërë gjykatësit Hasa. Tashmë kjo po analizohet dhe në bazë të saj është ngritur akuza ndaj gjykatësit të Elbasanit. Mendohet se ngritja e akuzës nga Hoxha është arsyeja për të cilën ai është larguar në drejtim të paditur, në mënyrë për t’i shpëtuar prangave. Dy ditë më parë Prokuroria e Përgjithshme pohoi zyrtarisht se Këshilli i Lartë i Drejtësisë pranoi kërkesën e këtij institucioni për heqjen e imunitetit të gjykatësit Qani Hasa, i akuzuar për “korrupsion pasiv”. Sipas prokurorisë, Hasa, disa vite më parë ka konsumuar akuzën duke përfituar një shumë prej 3 milionë lekësh të vjetra nga të afrimit e një personi që po gjykonte për akuzat “kultivim narkotikësh” dhe “armëmbajtje pa leje”. Sipas prokurorisë, në fund të procesit gjykata kishte dhënë 5 vjet burg, nga 10.5 që kishte kërkuar prokuroria për të pandehurin Geron Ocka. Kurse vetë gjykatësi Hasa pohoi se trupi gjykues që ai kryesonte kishte dhënë 9 vjet burg për Ockën, pra një vit e gjysmë më pak nga ç’kishte kërkuar prokuroria. Procesi ndaj Ockës është përfunduar në Gjykatën e Elbasanit në vitin 2006, ndërsa pak muaj më vonë është shqyrtuar edhe nga Gjykata e Apelit të Durrësit, e cila ka lënë në fuqi vendimin e Shkallës së Parë. Sipas prokurorisë në këtë kohë është bërë edhe kallëzimi i qytetarit Ibrahim Hoxha ndaj gjykatësit Qani Hasa. Ende nuk dihet arsyeja pse kallëzimi në ngarkim të gjyqtarit nuk është më parë në lëvizje nga drejtësia.          fa.ma.