Zhyten Bursat. Wall Street e Europa ne renie
Wall Street është mbyllur në rënie e në rënie janë çelur dhe bursat europiane, me rekorde të reja humbjesh.
Në SHBA u shënua rënie e aksioneve prej më shumë se 4 %. Në Tokio të Japonisë indeksi Nikkei ka shënuar rënie prej 3,7 %. Ndërkohë që humbje serioze janë shënuar edhe në bursat e Kinës dhe Koresë së Jugut. Rënie të tilla janë shënuar më parë në krizën e madhe financiare në botë në vitin 2008.
Indeksi i Britanisë së Madhe ra me 3.2%, Dax-i gjerman me 3,5%, ndërsa indeksi francez me 2.8%. Çmimet e naftës vazhduan të bien, ndërsa frika e një ngadalësimi ekonomik global godet çmimet e mallrave.
E enjtja e zezë në bursat botërore bart me vete drojën se perëndimi I vjetër nuk është në gjendje të përballet me kirizën e borxheve, e tani nuk janë më në rrezik thjesht Spanja e Italia, por dhe Franca.
Ekpertë të Standard & Poor thonë se investitorët besojnë se Europa është në gjendje të përballojë me sukses krizën greke e madje dhe një thellim të borxhit në Irlandë e Portugali, por problemet e vërteta sipas tyre janë ato të borxhit në Spanjë e Itali.
Banka Qëndrore Europiane ndërhyu menjëherë duke blerë bonot e vendeve në rrezik, një operacion që garanton likuiditet shtesë për bankat por dhe një monitorim më të vëmendshëm të rrezikut të çmimeve. Megjithatë, siç vërteton dhe kjo ditë e fundit e javës për bursat, këto masa nuk mjaftuan.
Ekspertë të ekonomisë fajsojnë për krizën më të fundit në tregje politikën çorientuese mes vendeve anëtare në zonën euro por dhe mungesën e perspektivës për zgjidhjen e problemeve akute në Spanjë, Greqi, Portugali e Irlandë. Por përtej rritjes së dobët europiane shtojnë ekspertët, rënia e mënjehërshme në bursa duhet ti atribuohet dhe një marrveshjeje të pakënaqshme për borxhin amerikan.
Delina Bitraku