Zv/Ministri Faslia: Mbështetja për zhvillimin rural do të synojë rritjen e prodhimit vendas

Bujqësia dhe sektori rural, janë sektorë potencialë të ekonomisë shqiptare dhe mbështetja për zhvillimin e tyre do të vazhdojë edhe në të ardhmen, me qellim rritjen e prodhimit vendas dhe konkurueshmërinë e prodhimeve bujqesore për të rritur eksportet në tregjet rajonale dhe ato europiane. Zëvendësministri i Bujqësisë, Ushqimit dhe Mbrojtjes së Konsumatorit Ndoc Faslia u shpreh se sektori bujqësor vazhdon të luajë një rol të rëndësishëm në ekonominë e vendit. Ai kontribuon me 21 % të Produktit të përgjithshëm bruto (GDP-se) dhe me këtë sektor merret më shumë se 50 % e popullsisë së aftë për punë në Shqipëri. Sipas tij, vlera e prodhimit bujqësor në total vlerësohet afersisht 2 miliard usd në vit dhe rritja ekonomike mesatare vjetore e këtij sektori në 5 vitet e fundit llogaritet në rreth 3,5 %. Bujqësia në Shqipëri dominohet nga ferma të vogla mesatrisht 1.2 ha dhe në të gjithë vendin ka afërsisht 360 mijë të tilla. Duke u ndalur në prioritet e prodhimit bujqësor, Faslia nënvizon faktin se, Shqiperia është vend mesdhetar dhe ka kushte shumë të përshtatshme për prodhimin e perimeve, drithrave, frutave, rrushit, ullirit si dhe mbarështimin e gjedhit dhe të blegtorisë së imët. Por, me shume interes, thotë ai, paraqitet prodhimi i perimeve në sera dhe i produkteve bujqësore BIO. Vitet e fundit thekson Faslia, investimet dhe mbështetja ndaj këti j sektori është rritur ndjeshëm. "Buxheti vjetor për bujqësinë arrin në 60 milion usd ose 1.2 % e buxhetit vjetor të shtetit", thotë ai, duke e cilësuar këtë si faktor në rritjen e prodhimit vendas i cili, "aktualisht plotëson rreth 90 % të nevojave për perime, 60 % për fruta, 70 % për mish, 90 % për qumësht dhe 40 % të nevojave për drithëra"-thotë Faslia. Në këtë kuadër, vijon ai, po bëhen përpjekje për përafrimin e legjislacionit dhe të standarteve të prodhimit me ato të BE-së. Ndërkohë që në zbatim të këtij legjislacioni po ngrihen edhe disa institucione të reja siç është agjensia për Zhvillimin Bujqësor dhe Rural dhe Autoriteti Kombëtar i Ushqimit. "Hapa këto,- thekson Faslia,- që po e përgatisin bujqësinë për t'u implementuar në programet evropiane,  në të cilin Shqipëria do të përfshihet pas marrjes së statusit të vendit kandidat për në BE.