Zv.kryeministrave u rriten pagat 30%

Zëvendëskryeministrat e Hashim Thaçit i kanë marrë pagat me ngritje. Në vendimin e Qeverisë për ngritje të pagave janë përfshirë tre zëvendëskryeministrat, Edita Tahiri, Bujar Bukoshi dhe tash së fundi u bashkohet edhe Behgjet Pacolli.

Ndërsa Hajredin Kuçi, Mimoza Kusari-Lila dhe Slobodan Petroviq nuk paguhen për postet e zëvendëskryeministrit. Këta të fundit marrin paga të njëjta si të gjithë ministrat e Qeverisë Thaçi pa ngritje, shkruan Kosova Sot.

Ndërsa Tahiri, Bukoshi dhe Pacolli, i cili ende nuk është paguar, por ka hyrë në listën e pagave të kabinetit Thaçi, do t’i marrin pagat me ngritje për 30 për qind.

Pagat pa ngritje, ishin 1356 euro, ndërsa që nga ky muaj pagat e tyre do të jenë 1763 euro, ka bërë të ditur një zyrtar i lartë i Qeverisë.

Opozita e ka kritikuar emërimin e gjashtë zëvendëskryeministrave nga ana e kryeministrit Hashim Thaçi.