Çerdhe dhe “hotel industrial” për romët e kthyer

Kryetari i Komunës së Mitrovicës, Avni Kastrati, vizitoi sot Lagjen e Romëve, ku është hapur një çerdhe për fëmijët romë të banorëve të kthyer në këtë lagje. Ai ka ofruar mbështetje për të gjitha nismat që vijnë për krijimin e kushteve më të mira për jetë në këtë mjedis, thuhet në një komunikatë shtypi të lëshuar nga shërbimi për informim i kësaj komune.

Kryetari Kastrati ka theksuar se KK do të ndihmojë me të gjitha kapacitetet që ka, në mënyrë që banorët e kthyer të ndjehen komodë. Ai ka sqaruar se Komuna do të ofrojë hapësira për projektet që të ndihmojë këta banorë, si për shkollim, ashtu edhe për punësim.

Kurse Agron Deda nga DRC-ja njoftoi se kjo çerdhe është hapur më qëllim që edhe fëmijët e banorëve romë të kthyer në lagjen e tyre të rindërtuar t’u ofrohet mundësi, sikur bashkëmoshatarëve të tyre të etnive të tjera, që të shkojnë nëpër çerdhe. Ai tha se në këtë çerdhe aktualisht janë të vendosur 30 fëmijë të këtyre banorëve, të cilët kanë edhe punëtorët që janë të angazhuar për t’u kujdesur për ta.

Përveç kësaj çerdheje, në këtë lagje në një nga objektet e reja të rindërtuara është hapur edhe një klasë ku dy mësuese, njëra në gjuhën shqipe dhe tjetra në gjuhën serbe, ndihmojnë nxënësit e kësaj lagjeje për të përforcuar mësimet që ndjekin në shkollat e tyre.

Në lidhje me procesin mësimor, Artan Bajrami, një nga banorët e kthyer në këtë lagje, tha se fëmijët e tyre edhe pse janë kthyer në jug, mësimet vazhdojnë t’i ndjekin në gjuhën serbe në shkollat e veriut të qytetit.

Ai tha se ka shumë probleme për shkak se ata duhet të udhëtojnë përditë, mirëpo ende nuk është gjetur një zgjidhje adekuate, meqë fëmijët kanë nisur nga fillimi, sa ishin në kampet në veri, që të mësojnë në shkollat e atjeshme dhe në gjuhën serbe, andaj tash është vështirë që t’u ndërpritet mësimi.

Në anën tjetër, zyrtarët e Caritasit, të cilët janë duke implementuar projektin e kësaj klase ndihmëse, thonë se së shpejti do të fillohet edhe me një projekt për gratë analfabete, në mënyrë që atyre t’u krijohet mundësia që të mësojnë shkrim dhe lexim.

Ngjitur me ndërtesat e bukura që janë ndërtuar për banorët romë në këtë lagje, zyrtarët komunalë së bashku me ata të DRC-së kanë nisur punën për hapjen e një “Hoteli industrial”, ku do të vendosen pajisje të ndryshme, si për zdrukthëtari, lavanderi etj, në mënyrë që të hapen edhe vende të reja pune.

Në këtë lagje deri me tani janë kthyer 120 familje, të cilat janë vendosur në ndërtesat për banim kolektiv si dhe në shtëpi private. Komuna ka ndarë disa hektarë për fazën tjetër të rindërtimit të kësaj lagjeje, ku parashihet ndërtimi i më tepër se 100 njësive të banimit, njofton shefi i Zyrës për Informim, Ahmet Jashari.