Çmimi i ujit të pijshëm do të njohë rritje

Administrimi i ujësjellësve nga pushteti lokal do të shoqërohet detyrimisht me një rritje çmimi të këtij produkti nga ana e tyre. Një gjë të tillë e konfirmoi dje në Komisionin e Ligjeve zëvendësministri i Financave, Sherefedin Shehu, i cili tha “se në buxhetin e pushtetit lokal kemi parashikuar një fond të veçantë për to, që në rast se rrisin çmimin e ujit, fondi do të përdoret për kompensimin e familjeve në nevojë”. Shehu tha se politika e rritjes së çmimit të këtij produkti duket se është e pashmangshme për shkak se uji i pijshëm shitet nën kosto. Ai tha se bordet e ujësjellësve, të cilët emërohen nga Këshilli Bashkiak dhe kryetari i ujësjellësit zgjidhet nga Bordi i Ujësjellësit, do të jenë të lirë në politikat e tyre të pavarura të administrimit. Shehu tha se fakti që qeveria u ka vendosur një fond të veçantë për kompensim, bordet e ujësjellësve do të jenë të lirë për rritjen e çmimit të ujit të pijshëm, duke përmirësuar këto ndërmarrje, si dhe nga ana tjetër, kjo rritje nuk do të prekë shtresat në nevojë, pasi do të kompensohen financiarisht nga shteti.