"Referendum në Burgas... Po në Vlorë?"

Gjatë mbledhjes së 20 dhjetorit, Këshilli Bashkiak i Burgasit vendosi që një referendum lokal do të mbahet në 17 shkurt 2008, lidhur me naftësjellësin Burgas-Aleksandropulos. Lajmi është bërë publik nga mediat e vendit. Pyetja së cilës do ti përgjigjen qytetarët e Burgasi në referendum është nëse janë dakord me ndërtimin e kësaj vepre industriale në territorin e bashkisë së tyre. Këshilltarët bashkiakë votuan edhe për një fond prej 60 mijë levash që do të përdoret për organizimin e referendumit, - njoftoi gazeta "Dnevnik". 10 mijë leva të tjera do të përdoren për një fushatë informuese 20-ditore. Një komision prej 7 personash do të organizojnë fushatën informuese. Që rezultatet të jenë të vlefshme sipas ligjeve lokale, në referendum duhet të marrin pjesë së paku 51 për qind e zgjedhësve. E solla këtë lajm në rubrikën tuaj, për të kuptuar se si i zgjidhin punët e tyre popujt e tjerë, se si janë marrëdhëniet mes qeveritarëve dhe qytetarëve në vende të tjera. Kurse Vlorës ia mohuan referendumin dhe madje ia kanë minuar edhe solidaritetin qytetar. Ky trajtim i qytetarëve të vet si njerëz të dorës së tretë, është i zakonshëm për standardet e qeverisësve shqiptarë, por është fyes për ata shqiptarë që kanë respekt për veten e tyre, për integritetin e tyre si njerëz të lirë; për ata shqiptarë që fëmijët e tyre do t'i rrisin këtu dhe duan një vend të pasur e të pastër dhe jo një vrimë haleje ku bëjnë miliarda një grusht ordinerësh, që pasi të lenë karriget do arratisen për të jetuar si sheikë, nëpër parajsat fiskale të planetit.