Abuzoi me pronat, arrestohet ish-kryetari i komunës

Antikorrupsioni ka vënë në pranga një ish-kryetar komune në rrethin e Pogradecit. Mbrëmjen e së mërkurës, në këtë qytet është arrestuar ish-kryetari i Komunës Dardhas të këtij rrethi, Ditor Fraholli, 37 vjeç, me akuzën e korrupsionit pasiv. I vënë në ndjekje prej kohësh, ish-kryetari i Komunës Dardhas është ndaluar në një postbllok policie në qytet dhe pasi i është komunikuar akuza e kryerjes së veprës penale për korrupsion pasiv është arrestuar dhe ka përfunduar në ambientet e paraburgimit në Komisariatin e Pogradecit. Aksioni për arrestimin e tij është kryer nga sektori i antikrimit ekonomik të Drejtorisë Rajonale të Policisë Korçë, në bashkëpunim me policinë e Pogradecit. Burimet e policisë thanë se ish-kryetari i komunës që e la postin në zgjedhjet e fundit lokale, ka abuzuar me detyrën duke ndarë toka me lekë dhe duke bërë pronarë persona që nuk kishin të drejtë ta përfitonin tokën kundrejt shpërblimeve të konsiderueshme.