Dervishaj: LSI e shqetësuar për ujësjellësit

LSI-ja ngre shqetësim për raportin mes pushtetit qendror dhe atij lokal në shpërndarjen e kompetencave. Sekretari për çështjet e brendshme, Sokol Dervishaj, vlerësoi se ky proces nuk po zhvillohet me qartësinë e nevojshme dhe në mjaft raste ai ballafaqohet me probleme të shumta, që e bëjnë të pamundur funksionimin e tij dhe e kthejnë këtë iniciativë në një demagogji të pastër. Sipas tij, i tillë është rasti i ujësjellësit, administrimi i të cilit nga pushteti vendor, në kushtet në të cilat është deleguar kjo kompetencë, është thuajse i pamundur, për shkak të formulës që përcakton zgjedhjen e bordeve dhe drejtuesve të këtyre ndërmarrjeve. "Nëse për zgjedhjen e Presidentit të Republikës nevojiten 60% e votave të deputetëve të Kuvendit të Shqipërisë, për zgjedhjen e drejtorit të kësaj ndërmarrjeje duhen 5 nga 6 vota të anëtarëve të Bordit Drejtues, pra mbi 85%", theksoi Dervishaj. Çka, sipas tij, në kushtet e një ndërmarrje aksionere është e pamundur kur aksioneri kryesor me mbi 60 apo 70% të aksioneve, që në rastin konkret janë bashkitë, kushtëzohen nga aksionerët më të vegjël të komunave, çka nuk respekton parimet e tregut dhe e politizon në maksimum këtë proces. "Ky ngërç artificial dhe i paramenduar krijon vështirësi të paadministrueshme në lidhje me administrimin financiar të ndërmarrjes", vijoi Dervishaj. LSI-ja konsideron se ky nuk mund të jetë kurrë një proces decentralizimi, por degradimi i këtyre ndërmarrjeve me qëllimin diabolik të privatizimit të tyre me vlera qesharake, sikurse ka ndodhur edhe me mjaft ndërmarrje të tjera shtetërore që kanë kaluar nëpërmjet këtij procesi.