FISHË TEKNIKE – Fillon numërimi mbrapsht për samitin Trump-Putin

ROMË, 15 gusht /ATSH-ANSA/ – Numërimi mbrapsht për takimin historik midis Donald Trump dhe Vladimir Putin filloi.

Samiti i mesgushtit në Alaska ka synim Ukrainën, por udhëheqësi i Kremlinit dëshiron ta përdorë atë si një mundësi për të rigjallëruar marrëdhëniet me Shtetet e Bashkuara.

Agjenda e Rusisë, e cila përfshin bashkëpunimin dhe armët, është shumë më e gjerë se agjenda “e zhveshur” amerikane, e cila ka një pikë të vetme: fundin e konfliktit në Ukrainë.

• ORA 21:00
• Takimi midis Donald Trump dhe Vladimir Putin në Anchorage, në bazën ushtarake ”Elmendorf-Richardson”, do të fillojë në orën 21:00. Është vlerësuar, nëse gjithçka shkon mirë, se i gjithë takimi mund të zgjasë të paktën tre deri në katër orë, kur do të jetë vonë natën në Evropë. Por, në kancelaritë kryesore të Evropës, pak do të jenë në gjumë. Në Helsinki në vitin 2018, takimi dypalësh midis dy udhëheqësve zgjati pothuajse dy orë.
• DELEGACIONET
• Putini do të shoqërohet nga tre ministra dhe disa zyrtarë shumë të besuar: këshilltari i Kremlinit Yuri Ushakov, këshilltari për Investimet e Huaja Kirill Dmitriev, ministri i Jashtëm Sergei Lavrov, ministri i Mbrojtjes Andrei Belousov dhe ministri i Financave Anton Siluanov do të jenë të pranishëm. Delegacioni i Trump do të përfshijë, ndër të tjerë, sekretarin e Shtetit Marco Rubio dhe të Dërguarin Special Steve Witkoff.
• PROGRAMI
• Samiti do të hapet me një takim ballë për ballë midis dy udhëheqësve pas dyerve të mbyllura: vetëm në një dhomë, përveç përkthyesve, siç ndodhi në Helsinki. Takimi dypalësh do të pasohet nga një drekë pune dhe diskutime midis dy delegacioneve. Ai do të përfundojë me një konferencë për shtyp, e cila pritet të jetë e përbashkët, përveç nëse dialogu bëhet i ndërlikuar.
• AXHENDA
• Qëllimi i Trump është të arrijë paqe midis Rusisë dhe Ukrainës, duke bërë një hap tjetër drejt çmimit Nobel për Paqen që ai aspiron. Axhenda amerikane e ka Kievin si përparësi, ndërsa ajo e Rusisë është shumë më e gjerë. Kremlini synon të nisë një “rivendosje” të marrëdhënieve me Shtetet e Bashkuara, duke përfshirë bashkëpunimin e mundshëm dypalësh tregtar dhe ekonomik. ”Cari” shpreson që Rusia dhe Shtetet e Bashkuara të mund të fillojnë punën për një traktat të ri strategjik për kontrollin e armëve pas samitit të Alaskës. Aktualisht, vetëm një marrëveshje midis dy vendeve, START-i i Ri, është në fuqi, e cila do të skadojë në shkurt./  a.jor.