GJENETIKË – Nis puna për krijimin e ADN-së artificiale njerëzore nga e para

LONDËR, 26 qershor /ATSH/ – Kanë nisur punimet për një projekt të diskutueshëm që synon të krijojë nga e para blloqet ndërtuese të jetës njerëzore, në atë që besohet të jetë i pari në botë, shkruan BBC.

Studimi  deri më tani ka qenë tabu për shkak të frikës se mund të çojë në ‘’fëmijë të projektuar’’ ose ndryshime të paparashikuara për brezat e ardhshëm.

Por tani, organizata bamirëse më e madhe mjekësore në botë, Wellcome Trust, ka premtuar një shumë fillestare prej 10 milionë paundësh për të nisur projektin dhe thotë se ka potencialin të bëjë më shumë mirë sesa dëm, duke përshpejtuar trajtimet për shumë sëmundje të pashërueshme.

Dr. Julian Sale, nga Laboratori i Biologjisë Molekulare MRC në Kembrixh, i cili është pjesë e projektit, deklaroi se ‘’ai përfaqëson hapin e madh të radhës përpara në biologji’’.

“Qielli është limiti. Ne po shqyrtojmë terapi që do të përmirësojnë jetën e njerëzve ndërsa plaken, që do të çojnë në plakje më të shëndetshme dhe më pak të sëmura ndërsa plaken.

“Ne po përpiqemi ta përdorim këtë qasje për të gjeneruar qeliza rezistente ndaj sëmundjeve që mund t’i përdorim për të ripopulluar organet e dëmtuara, për shembull në mëlçi dhe zemër, dhe madje edhe në sistemin imunitar”, theksoi ai.

Por kritikët kanë frikë se studimi u hap derën studiuesve të paskrupullt që kërkojnë të krijojnë njerëz të përmirësuar ose të modifikuar.

“Na pëlqen të mendojmë se të gjithë shkencëtarët janë aty për të bërë mirë, por shkenca mund të ripërdoret për dëm dhe për luftë”, deklaroi Dr. Pat Thomas, drejtor i grupit të fushatës Beyond GM.

Çdo qelizë në trupin tonë përmban një molekulë të quajtur ADN që mbart informacionin gjenetik që i nevojitet. ADN-ja përbëhet vetëm nga katër blloqe shumë më të vogla, të quajtura A, G, C dhe T, të cilat përsëriten vazhdimisht në kombinime të ndryshme./  /os/