Kapitulli i negociatave për bujqësinë, Salla takim me Superti-n: Po konsolidojmë sistemet dhe kapacitetet për integrimin në BE
Ministri i Bujqësisë dhe Zhvillimit Rural, Andis Salla, zhvilloi sot një takim me znj. Valentina Superti, Drejtoreshë për Ballkanin Perëndimor në Drejtorinë e Përgjithshme për Zgjerimin dhe Fqinjësinë Lindore pranë Komisionit Evropian.
Takimi u fokusua në progresin dhe sfidat e Ministrisë së Bujqësisë në kuadër të përgatitjeve për hapjen e negociatave ndërqeveritare dhe përafrimin me acquis të Bashkimit Evropian.
Diskutimet u zhvilluan në kontekstin e miratimit të Pozicionit Negociues për Cluster 5 “Burimet, Bujqësia dhe Kohezioni”, duke e vendosur Shqipërinë në një fazë kyçe të procesit të integrimit evropian.
Në një postim në rrjetet sociale, ministri Salla theksoi angazhimin e Ministrisë për përmbushjen me intensitet të detyrimeve të integrimit.
“Ministria e Bujqësisë dhe Zhvillimit Rural po vijon me konsolidimin e sistemeve të integruara të menaxhimit (IACS, LPIS, REM), forcimin e kapaciteteve teknike dhe administrative, si dhe përgatitjen për një qasje efektive në fondet e BE-së,” shkroi ai.
Salla nënvizoi gjithashtu se “Modernizimi i bujqësisë dhe ndërtimi i një sektori konkurrues e të qëndrueshëm mbetet një ndër prioritetet strategjike të qeverisë shqiptare në kuadër të procesit të anëtarësimit në BE.”
Nga ana e saj, Superti vlerësoi progresin e bërë nga Shqipëria në këtë drejtim .
/rtsh.al/