Sefgjini, akuza dërgon çështjen në Gjykatën e Lartë

Tiranë- Çështja “Sefgjini” është dërguar në Gjykatën e Lartë, sepse organi i akuzës ka kërkuar për të rikthimin e masës së sigurisë “arrest shtëpie”.

Lajmi bëhet i ditur nga burimet pranë gjykatës, sipas të cilave, prokurori i çështjes, e ka quajtur të padrejtë vendimin e Apelit, në bazë të të cilit Arben Sefgjini u la i lirë.

Lrimi i Sefgjinit, sipas prokurorisë ishte i paligjshëm dhe për këtë, akuza kërkon pranë organit më të lartë gjyqësor rikthimin e masës së sigurisë “arrest shtëpie”. Burime pranë Gjykatës së Lartë pohojnë se kërkesa tashmë është e depozituar, ndërkohë që pritet të merret në shqyrtim.

Para kësaj, ashtu si e kërkojnë procedurat duhet që më parë të hidhet shorti, e më pas të vijojë shqyrtimi i kërkesës.

Krahas rikthimit të masës së sigurisë “arrest shtëpie” për Sefgjinin, kërkohet e njëjta masë sigurie edhe për dy të akuzuarit e tjerë Avni Koldashin dhe Budjon Meçen.

Sipas akuzës paligjshmëria e vendimit të apelit qëndron në faktin se trupi gjykues që duhet të jepte vendimin duhet të përbëhej pre 5 gjyqtarësh dhe jo tre siç ndodhi në fakt. Tani i mbetet Gjykatës së Lartë të vendosë për lirimin ose jo të Sefgjinit, që akuzohet për rrëmbim dhe tortura me pasojë të rënda ndajbiznesmenit Remzi Hoxha.