Shisnin kokainë në lokal, pranga katër shpërndarësve

Një grup shpërndarësish droge kanë përfunduar në prangat e policisë, kur ata kishin organizuar një festë për klientët e tyre. Operacioni për kapjen e katër personave u realizua gjatë orëve të natës në një zonë të Tiranës. Informacioni i kishte mbërritur policisë për këtë grup pas kapjes së një përdoruesi mesditën e së mërkurës. Kështu, antidroga e kryeqytetit ka mundur t‘u sekuestrojë pesë personave të arrestuar edhe lëndën narkotike të llojeve të ndryshme.

Në një konferencë për shtyp, Drejtoria e Policisë së Tiranës deklaroi se profesionalizimi nga specialistët e sektorit të luftës kundër drogës, kanë mundësuar finalizimin e operacionit të koduar "Inaugurimi" mbi lokalizimin e bllokimin e një lokali, ku njëkohësisht u arrestuan edhe katër persona. Lokali i bllokuar dyshohet se shërbente për shpërndarjen dhe shitjen e lëndëve narkotike. Sipas të dhënave zyrtare, në prangat e antidrogës përfunduan Migen Gafurr Mele, 25 vjeç, Romeo Gjergji Kio, 26 vjeç, Elton Reshat Dodo, 29 vjeç dhe Marius Fatmir Sulaj, 24 vjeç, të gjithë banues në Tiranë. "Arrestimi i tyre u realizua pas një operacioni në rrugën "Sitki Çiçi", në lokalin "Red Lion" të marrë me qira, ku këta persona u kapën në flagrancë", deklaroi policia. Sipas grupit hetimor, këta persona kishin organizuar një festë për inaugurimin e lokalit të tyre. Ndërkohë, veç faturës së lokalit, mbështjellë në të dërgoheshin edhe dozat e drogës. Gjithashtu, Policia e Tiranës tha mbrëmë se ka arrestuar një nëpunës të Ministrisë së Bujqësisë. Murat Shehu dyshohet se i ka marrë ryshfet dhjetëra milionë lekë një firme që importonte lule në vendin tonë. Burimet pohojnë se Shehu ka qenë nën hetim për disa muaj në bazë të disa informacioneve operative.