‘Zhduket’ Mourinho

Një ditë pasi u shfaq para medieve spanjolle për herë të parë nga muaji prill, trajneri i Real Madridit, Jose Mourinho u zhduk sërish.

Strategu portugez nuk u paraqit në konferencën për shtyp pas barazimit të skuadrës së tij 2-2 kundër Barcelonës në Santiago Bernabeu, të dielën, në ndeshjen e parë të Superkupës së Spanjës.

Asistenti i tij, Aitor Karanka tha se Mourinho nuk u paraqit për shkak se “kjo ishte një dinamikë të cilën e kemi përdorur vitin e kaluar”.

Karanka zëvendësoi Mourinhon në konferencat për shtyp nga prilli, kur portugezi ishte dënuar për pesë ndeshje pas kritikave ndaj UEFA-s dhe gjyqtarëve që, sipas tij, favorizonin Barcelonën në Ligën e Kampionëve.

Për herë të parë prej asaj kohe, Mourinho u kthye të shtunën dhe tha: “Askush nuk mund të më hesht”. Karanka nuk tregoi nëse Mourinho do të kthehet për të folur sërish para ndeshjes së kthimit në Nou Camp, të mërkurën.