“Patriotic Hypermarket” n’Modena

Shfaqja “Patriotc Hypermarket”, me regji të Dino Mustafic, e bazuar në tekstin e shkruar nga Jeton Neziraj dhe Milana Bogavac, do të jepet në qytetin italian Modena, më 31 maj. Bëhet këtu fjalë për njërin nga festivalet më të mira të skenës moderne artistike në Evropë.

Edicioni i sivjetmë, i teti me radhë, do të mbahet prej datës 24 maj deri më 2 qershor. Në fokus të festivalit do të jetë skena moderne teatrore, gjegjësisht risitë interesante dhe çështjet aktuale të cilat trajtohen nga artistët modernë në gjithë botën.

Kjo pjesëmarrje kaq e rëndësishme në Itali u parapri me pjesëmarrjen e kësaj shfaqjeje edhe në Bosnje e Hercegovinë. Në organizim të Festivalit Ndërkombëtar Teatror - MESS, shfaqja “Patriotic Hypermarket” (Hipermarketi Patriotik) u dha më 21 prill, në Tetarin Popullor të Bosnje e Hercegovinës, në Zenicë. Pastaj, më 22 prill, shfaqja u dha edhe në Teatrin e Sarajevës – SARTR, në kuadër të ‘Modulit të Memories 2012’.

Ndryshe, premiera e shfaqjes që flet për jetën e shqiptarëve dhe serbëve në Kosovë u dha në tetor të vitit 2011, në Bitef Teatar, në Beograd.

Shfaqja është krijuar si kooproduksion i Asociacionit KulturaNova nga Novi Sadi (Vojvodinë), i Qendrës Multimedia nga Prishtina, dhe i Bitef Teatar nga Beogradi. Shfaqja është pjesë e projektit artistiko-hulumtues “Vështrimet: Takimi i Historive Personale të Shqiptarëve dhe Serbëve”, që synon të parashtrojë pyetje të ndryshme lidhur me kujtimet personale të dëshmitarëve të konfliktit serbo-shqiptar, por lidhur me vizionet e tyre për të ardhmen dhe për mundësitë e një bashkëjetese mes serbëve e shqiptarëve.

Hulumtimi në fjalë ka përfunduar e një ekspozitë të fotografive dhe me publikimin e një broshure në tri gjuhë, pjesë e së cilës janë edhe intervistat e kryera gjatë hulumtimit, në bazë të të cilave dramaturgu kosovar, Jeton Neziraj, dhe dramaturgia serbe, Milena Bogavac (nga Beogradi), shkruan një tekst të përbashkët dramaturgjiko-dokumentar.

Regjia e shfaqjes së bazuar mbi këtë tekst është bërë nga regjisori boshnjak, Dino Mustafic, ndërkohë që rolet kryesore në “Patriotic Hypermarket” u janë besuar aktorëve nga Prishtina, Beogradi, Shkupi e Tirana: Dubravka Kovijanic (Beograd), Kushtrim Hoxha (Prishtinë), Milutin Milosevic (Beograd), Bajrush Mjaku (Shkup), Ema Andrea (Tiranë), Slobodan Bestic (Beograd), etj.