AMC ndan çmimet e projektit “Realizimi i një ëndrre”

Tri grupe me punonjës të AMC-së u mblodhën dje në sallën ‘Black Box’ të Universitetit të Arteve në Tiranë, për ndarjen e çmimeve të projektit “Realizimi i një ëndrre”. Qëllimi i projektit ishte të krijonte ndryshime të prekshme për tri institucione të specializuara për t’u kujdesur për fëmijët në nevojë. “Në korrik, tri grupe me nga 15 punonjës të AMC-së u përfshinë në projekte që kishin si objektiv t’i shtonin vlerë jetës së përditshme të fëmijëve në Fshatin SOS, në Institutin e Fëmijëve që nuk Dëgjojnë dhe në Institutin e Nxënësve që nuk Shikojnë”, thuhet në një njoftim të kompanisë. Dhjetëra punonjës të AMC-së lexuan në mënyrë vullnetare libra artistikë dhe me informacion të dobishëm, të cilët u regjistruan dhe iu dhuruan në formën e një biblioteke zanore Institutit të Nxënësve që nuk Shikojnë. Ndërkohë, këtu u ngrit edhe një studio regjistrimi që u jep mundësinë e regjistrimit të librave shkollorë, por fëmijët mund të regjistrojnë edhe krijimet e tyre letrare apo interpretimet muzikore. Grupi i punonjësve i caktuar në Fshatin SOS ndërtoi një fushë sportive dhe një kinema për fëmijët. Gjithashtu krijoi një bibliotekë me libra që i dhuruan punonjësit e AMC-së. Dhoma ndenjeje të rehatshme për djemtë dhe vajzat e Institutit të Fëmijëve që nuk Dëgjojnë dhe një mensë moderne, ishin rezultati i përkushtimit që grupi përkatës i AMC-së tregoi gjatë projektit. “Grupet e AMC-së kishin dhe mbështetjen e kontribuuesve Digitalb, Megatek, Abcom, Alba Logic, Nokia Siemens Network Albania, Anosis, Ogilvy, AMC Love Radio, Suli shpk, Kejsi Color, Bonus, Iliria 02 dhe Titan Cement”, thuhet në njoftim.