Abuzimi me fëmijët, 20 vjet burg për Braun

TIRANË- Pas nëntë muajsh gjykim, Prokuroria e Tiranës kërkoi dënimin me 20 vjet burg për David Braun.Sipas konkluzioneve të prokurorit Kol Hysenaj, i pandehuri 60- vjeçar Braun, gjatë periudhës 2003-2005 ka abuzuar në dy raste, ndaj fëmijëve të mitur dhe endacakë që jetonin në qendrën e tij bamirëse në rrugën “Dervish Hekali”. “Nga hetimi gjyqësor është provuar dhe faktuar me anë të dëshmitarëve të viktimave se i pandehuri David Braun ka konsumuar veprën penale të “marrëdhënieve homoseksuale me të mitur” në bashkëpunim dhe për kryerjen e kësaj vepre të rëndë penale kërkojmë dënimin e tij me 20 vjet burg”,-tha prokurori. Gjithashtu, prokurori nënvizoi se për vuajtjen e këtij dënimi, i pandehuri duhet të izolohet në një burg të sigurisë së lartë, për shkak të rrezikshmërisë së kryerjes së kësaj vepre penale. Sipas konkluzioneve, i pandehuri ka abuzuar me dy të mitur të moshës 6 dhe 7 vjeç, në kohën kur këta të mitur jetonin dhe banonin në qendrën bamirëse “Fëmijët e tij” që ndodhej në rrugën “Dervish Hekali”, në banesën private me nr. 32, për shkak të kushteve të këqija ekonomike pranë familjeve të tyre. Kjo seancë gjyqësore zgjati rreth 1 orë e 15 minuta, ku pas leximit të konkluzioneve të prokurorit gjykata vendosi të ndërpresë shqyrtimin gjyqësor për t’i lënë kohë avokates mbrojtëse të përgatisë pretendimet përfundimtare. Mësohet se gjatë seancave të kaluara, i pandehuri Braun ka pretenduar disa herë se ishte impotent dhe nuk mund të kryente marrëdhënie homoseksuale për shkak të sëmundjes së fimozës, që për ekspertët mjeko-ligjorë kjo nuk është e vërtetë. Sipas prokurorisë, janë katër fëmijë, ndaj të cilëve është abuzuar nga i pandehuri Braun dhe dy -ish punonjësit e kësaj qendre bamirëse që po gjykohen në një proces tjetër gjyqësor, të pandehurit Dino Christodulu dhe Robin Arnold. Arrestimi i shtetasit anglez David Braun, u bë më 18-maj të vitit 2006, pas kallëzimit të disa të miturve endacakë, të cilët akuzonin ish-administratorin e qendrës së bamirësisë “His Children” se abuzonte seksualisht me ta. Ndërkohë, vetëm dy ditë pas arrestimit të Braun, policia shqiptare arrestoi edhe kuzhinierin e kësaj qendre, shtetasin Janaq Papleka i cili u dënua për veprën penale të “mos kallëzimit të krimit”, ndërsa akuzoi edhe dy shtetasit e tjerë anglezë Dino Christodolu dhe Robin Arnold, të cilët u ekstraduan vetëm pak muaj më parë, se kanë kryer edhe ata veprën penale të “marrëdhënieve homoseksuale me të mitur” gjatë qëndrimit me punë në këtë qendër bamirëse.