Agim Zeqo braktis Skënderbeun
Agim Zeqo
Agim Zeqo nuk është më president i klubit të Skënderbeut. Zërat që qarkullonin prej kohësh pranë skuadrës korçare u konfirmuan dje në drekë, kur biznesmeni Zeqo zyrtarizoi “divorcin”. Pas dy vitesh e gjysmë në krye të klubit ai dha dorëheqjen e parevokueshme, duke sqaruar me një mesazh se ka vendosur të largohet për shkak të angazhimeve që ka me bizneset e tij. Edhe miqtë e ngushtë të ish-presidentit të Skënderbeut tregojnë për “Panorama Sport” se kohët e fundit Zeqo ishte ndier i lodhur nga detyra që kishte marrë përsipër të bënte në klubin korçar. “Po lë shumë gjëra pas dore me bizneset e mia, nuk mundem të vazhdoj më”. Kështu mësohet t’u ketë thënë Zeqo bashkëpunëtorëve të tij. Edhe pse klubi që ai drejtonte ka qenë sistematikisht i akuzuar nga rivalët për mënyrën se si i fitonte ndeshjet, përsëri dominoi në Kategorinë Superiore, duke fituar titullin kampion dy herë radhazi. Nëpërmjet një mesazhi telefonik, Zeqo ka vënë në dijeni mediat për largimin e tij nga Skënderbeu. Ish-presidenti i korçarëve deklaroi: “Të dashur miq të mediave, më lejoni t’u informoj se sot (dje) largohem pas një periudhe prej 2 vitesh e gjysmë në krye të klubit të Skënderbeut. Për arsye të angazhimeve në bizneset e mia kam vendosur ta lë këtë post. Jam munduar që në këtë periudhë të jap maksimumin tim në ecurinë e skuadrës, si në aktivitetet kombëtare, ashtu edhe në ato ndërkombëtare. I falënderoj të gjithë ata që më mbështetën financiarisht në këtë “aventurë” të bukur dhe me shumë adrenalinë! Besoj se me rezultatet që arriti Skënderbeu në këto dy vite, e justifikoi investimin dhe i ktheu qytetit tim të lindjes krenarinë e munguar”.
Ardian Takaj, presidenti i ri i klubit
Ardian Takaj do të jetë presidenti i ri i klubit të Skënderbeut. Gjithçka u zyrtarizua dje pas mbledhjes së donatorëve. Takaj nuk është një emër i panjohur, pasi në dy vite e gjysmë që Skënderbeu drejtohej nga Agim Zeqo, edhe ai ka qenë pjesë e financimit. Në rolin e zv.presidentit, Takaj e ka ndihmuar jo pak skuadrën korçare, veçanërisht në akomodimin e saj. Biznesmeni është pronar i një kompleksi në Durrës, aty ku Skënderbeu grumbullohet rregullisht gjatë kampionatit. Biznesmeni ka luajtur një rol të rëndësishëm në klub gjatë viteve të fundit dhe tashmë do të udhëheqë Skënderbeun.