Akademia e Partizanit nxirret në rrugë

Nga Edmond Sufaj

Ekipet zinxhir të të kuqve nuk lejohen prej tri ditësh që të kryejnë stërvitje në Qendrën Sportive Olimpike, ose siç njihet me emrin, ish-kompleksi Dinamo

Ekipet e akademisë së Partizanit nuk lejohen prej tri ditësh që të kryejnë stërvitjen sipas programit në Qendrën Sportive Olimpike, ose siç njihet me emrin ish-kompleksi Dinamo. Sipas klubit të kuq, drejtuesja e kësaj qendreKlodiana Shala nuknuk ka dhënë asnjë përgjigje gjatë këtyre ditëve mbi arsyen e mos lejimit të ekipeve zinxhir të klubit Partizani që të kryejnë stërvitjen në këtë ambjent.

Në këtë kompleks kryejnë stërvitje disa klube, ku përfshihen dhe ekipet e akademisë së Partizanit. Për stërvitjet e kryera, skuadrat realizojnë dhe pagesat përkatëse te kjo qendër. Drejtuesit e Partizanit shprehen se është kryer çdo muaj pagesa për përdorimin e kësaj qendre për ekipet e moshave, duke nënkuptuar se problemi nuk qëndron në këtë aspekt, por diku tjetër.

Pas nxjerrjes në rrugë të ekipit të parë nga ish-kompleksi i saj, tashmë i ka ardhur radha dhe ekipeve të akademisë, që të nxirren në rrugë nga Qendra Sportive Olimpike. Kjo është situatë shumë e rëndë, kur në një kohë që mungojnë terrenet sportive, edhe ato që ekzistojnë ende marin vendime në dëm të sportit të futbollit.