Aksident në autostradë, vdes shoferi 15 vjeç

Një aksident i rëndë automobilistik ka ndodhur dje në mëngjes në autostradën Durrës-Morin, në afërsi të Kukësit. Një djalë 15 vjeç ka humbur jetën, pasi makina e tij u përplas me një automjet tjetër. Policia e Kukësit saktësoi se ngjarja ndodhi në orët e paradites së të premtes në segmentin Ura e Drinit të Zi-Mamëz, në lagjen "Drinas", ku autovetura tip "Volkswagen Golf", me targa Kukësi, e drejtuar nga 15-vjeçari Platin Mehmeti është përplasur me një "Mercedes Benz" me targa Tirane, të drejtuar nga shtetasi turk Aili Galip Osturk, 35 vjeç. Nga përplasja e fuqishme ka mbetur i vdekur në vend 15-vjeçari Mehmeti, banor i lagjes "Drinas" të Kukësit, ndërsa drejtuesi i mjetit tjetër ka marrë lëndime të lehta. Burime të policisë thonë se shkaku i aksidentit ka qenë tejkalimi i shpejtësisë, por për këtë rast është ngritur çështja penale dhe dosja është dërguar në prokurori. Në segmentin Kalimash-Morin të autostradës ky është aksidenti i parë me pasojë vdekjen, që nga fillimi i funksionimit të autostradës në njërin nga akset e saj. Drejtimi i mjeteve nga adoleshentët ka qenë një nga problemet serioze me të cilat është përballur qarkullimi rrugor në Kukës, veçanërisht në autostradë si dhe brenda qytetit.