Aksidentet shkaktojnë dy të vdekur, tre të plagosur
Burime nga policia bënë të ditur se shpejtësia ka qenë shkak për fatkeqësitë e ndodhura të enjten në Elbasan e Fier
Dy vetë kanë ndërruar jetë ndërsa tre kanë mbetur të plagosur rëndë si pasojë e dy aksidenteve që kanë ndodhur ditën e enjte përkatësisht në rrethin e Elbasanit dhe të Fierit. Aksidenti me bilanc më tragjik ishte ai i ndodhur në aksin rrugor Elbasan - Peqin, pas të cilit një person ndërroi jetë teksa tre të rinj u dërguan në spitalin e Elbasanit për të marrë ndihmën e parë.
Burime nga policia bënë të ditur se gjithçka ndodhi rreth orës 17:35 në afërsi të fshatit Pajovë. Si pasojë e përplasjes së automjetit tip "Benz" me targë DR 6832 C me automjetin tip "BMV" me targë PE 1912 A mbetën të plagosur rëndë të katër shtetasit që ndodheshin në dy automjetet e përfshira.
Banorë të zonës dhe shoferë të rastësishëm kanë dhënë ndihmën e parë duke dërguar me shpejtësi të aksidentuarit në spitalin e Elbasanit, por gjatë transportit njëri prej tyre, ende i paidentifikuar, ka ndërruar jetë, ndërsa tre të rinjtë e tjerë ndodhen në gjendje kritike në spital për shkak të plagëve të rënda që kanë marrë.
Mësohet se të plagosurit janë: Stiven Bozo, 20 vjeç, me banim në Durrës, Aleksandër Kurti, 20 vjeç, me banim në Pajovë dhe Saimir Hokja, 23 vjeç, po me banim në Pajovë. Në vendin e ngjarjes shkuan policia dhe ekspertët. Nga hetimet paraprake rezulton se shkak i këtij aksidenti ka qenë shpejtësia tej normave të lejuara.
Por ndërkohë një tjetër aksident me pasojë vdekjen u regjistrua mëngjesin e djeshëm në rrugën nacionale Fier - Vlorë. Gjithçka ka ndodhur në vendin e quajtur Ferras, rreth katër kilometra larg qendrës së komunës Levan. Sipas policisë rrugore të Fierit, rreth orës 05:30, shtetasi Haki Zeka, ka qenë duke udhëtuar në drejtim të Vlorës.
Duke drejtuar një mjet tip "Golf" me targa VL 7501 A, atij i ka dalë përpara një karro, të cilën e ka shmangur, por në këtë moment, ndërsa ka dalë nga krahu i kundërt, është përplasur me një mjet furgon tip frigorifer me targa VL 5798 C, i cili shkonte në drejtim të Fierit. Përplasja ka qenë e fortë dhe drejtuesi i mjetit "Golf", Haki Zeka, 57 vjeç, ka gjetur vdekjen e menjëhershme.
Në vendin e ngjarjes kanë mbërritur forca të policisë, të cilët kanë mundur të nxjerrin viktimën nga mjeti, i cili pas përplasjes kishte pësuar dëmtime të mëdha duke bllokuar edhe dyert. Sipas policisë, dyshohet se drejtuesi i mjetit "Golf" ka bërë një parakalim të gabuar që i ka kushtuar jetën. Drejtuesi i furgonit është shoqëruar në komisariat për t'u pyetur për këtë ngjarje.
Ky ishte aksidenti i dytë brenda disa orësh në Fier. Mbrëmjen e së mërkurës, rreth orës 18:00, në rrugën nacionale Fier -Vlorë në vendin e quajtur fshati Levan, shtetasi Ervis Hysenshahaj, 21 vjeç, duke drejtuar automjetin tip "Land Rover" me targë H495-PBO ka aksidentuar shtetasin Sulo Suli, i cili ka gjetur më pas vdekjen në qendrën spitalore Fier. Ky shtetas është arrestuar nga policia për veprën penale "shkelje të rregullave të qarkullimit rrugor".