Akuza ministrisë në Shkup: Inskenoi vrasjen e shqiptarëve

Shqiptarët e Maqedonisë po alarmohen nga zhvillimet e fundit në këtë vend, si vrasja e katër shqiptarëve afër kufirit me Kosovën, duke kujtuar krijimin e një situate të njëjtë, si ajo e vitit 2001. Në atë kohë, midis etnisë shqiptare dhe asaj maqedonase shpërtheu një luftë e mirëfilltë. Marrëveshja e Ohrit, e cila ishte dokumenti që i dha fund konfliktit mes tyre, duke kërkuar obligimin e politikës maqedonase për të ofruar më shumë të drejta për shqiptarët, nuk po zbatohet ende me korrektësi. Arrestimet gjatë muajve të fundit, bastisjet nëpër shtëpitë e shqiptarëve, mosrespektimi i marrëveshjes së Ohrit, ka nxitur reagimin e një pjese të popullsisë shqipfolëse në Maqedoni, të cilët akuzojnë se qeveria Gruevski praktikon një politikë antishqiptare. Ata mendojnë se vrasja e katër shqiptarëve, ishte një skenar i përgatitur nga Ministria e Brendshme maqedonase. Pyetja që ngrenë për këtë ngjarje është: Pse nuk shpërtheu furgoni i shqiptarëve, i bërë shoshë nga plumbat e policisë së Maqedonisë, kur paska pasur kaq shumë eksploziv brenda? Kreu i Bashkimit Demokratik Shqiptar, Bardhyl Mahmuti deklaroi dje se vrasja e katër shqiptarëve në Radushë është një spektakël tragjik i kurdisur nga Ministria e Punëve të Brendshme e Maqedonisë. “Kjo ngjarje nxjerr në pah frymën antishqiptare të institucioneve shtetërore maqedonase. Propagandimi me pompozitet i vrasjes së katër shqiptarëve dhe ekspozimi i ‘fakteve’ për gjoja implikimin e tyre në trafiqe armësh, nxjerrin në pah kurdisjen e këtij skenari dhe përpjekje për të fshehur ekzekutimin e tyre monstruoz”, tha ai për mediat, duke shtuar se “Sikur realisht të kishte pasur gjithë atë Eksploziv në furgon, të gjithë e dimë se vetëm një shkëndijë e vogël do të provokonte një shpërthim të fuqishëm, që do të ishte dëgjuar në të gjithë Maqedoninë”. Kjo parti ka kërkuar që të bëhet një ekspertizë e pavarur për të hedhur dritë mbi këtë ngjarje. Ndërsa pak orë pas ngjarjes që ndodhi orët e para të mëngjesit të së mërkurës u identifikuan trupat e tre prej katër viktimave shqiptare, dje autoritetet maqedonase kanë identifikuar trupin e katërt dhe ia kanë dërguar atë familjes së tij. Ai është Harun Aliu, i njohur si komandant Kushtrimi, njëkohësisht kryetar i Partisë Alternativa Kombëtare. Për Aliun ekzistonte një fletë-arresti, pasi ai ishte i dënuar në mungesë me burg të përjetshëm nën akuzat e vrasjes së një polici. Aliu konsiderohej si organizator i grupit, që në shenjë hakmarrjeje për aksionin policor në fshatin Brodec, më 3 janar të vitit 2008, sulmoi një xhip të policisë, gjatë të cilit sulm u vra polici Zoran Markovski, ndërsa katër kolegë të tij u plagosën. Ministria e Brendshme maqedonase tha se shqiptarët e vrarë po transportonin një arsenal armësh nga Radusha në drejtim të Shkupit dhe nuk ndaluan në një pikë kontrolli të policisë, duke qëlluar me armë kundër forcave të rendit.