Kameron: Britania do të qëndrojë larg euros për 5 vitet e ardhshme

Koalicioni i ri qeveritar në Britani mbajti dje takimin e tij të parë formal, ku u përpoqën të tregonin se anëtarët e dy forcave mund të punonin mirë së bashku, megjithëse kanë ideologji të ndryshme. Kabineti i ri qeveritar ka 18 ministra konservatorë dhe 5 nga liberal-demokratët. Kryeministri konservator, David Kameron drejtoi takimin me zëvendësin e tij, Nik Kleg, lideri liberal-demokrat. Zyrtarët diskutuan deficitin e madh buxhetor në Britani, reformën bankare dhe Afganistanin. Takimi përfundoi me një marrëveshje për të shkurtuar me 5 për qind vetë pagat e tyre, si pjesë e përpjekjeve për të shkurtuar deficitin rekord prej 235 miliardë dollarësh, sipas agjencisë britanike “Press Association”. Pas takimit, ministrat thanë për gazetarët në Londër se ata kishin punuar mbi qëllimet e përbashkëta dhe lidershipi i Qeverisë së re ishte “tërësisht i fokusuar dhe i unifikuar”, dhe se takimi kishte kaluar për mrekulli. Megjithatë politikat e konservatorëve dhe liberal-demokratëve janë shumë të ndryshme. Konservatorët mbrojtën sistemin e raketave nukleare, “Trident”, të cilin liberal-demokratët donin ta eliminonin. Qeveria e re nuk do të japë amnisti për emigrantët e paligjshëm dhe nuk do të lejojë Britaninë të integrohet më shumë në BE, dy pika që liberal-demokratët i kishin propozuar në programin e tyre. Por ata fituan ndryshimet në sistemin e taksave, që do të rëndojnë më shumë mbi të pasurit dhe ndryshimet në formulat e financave për arsimin. Ata fituan gjithashtu një premtim për një referendum për të ndryshuar sistemin e votimit, për ta bërë më të lehtë që partitë e vogla të fitonin vende në Parlament. Në mbledhjen qeveritare, Kameron premtoi të hartojë një buxhet emergjence brenda 50 ditësh dhe të parashtrojë planet për të kursyer gati 9 miliardë dollarë gjatë vitit të tanishëm fiskal. Udhëheqësi i Partisë Konservatore premtoi një numër reformash bankare dhe ta mbajë Britaninë larg euros për pesë vjetët e ardhshëm. Emërimet në kabinet përfshijnë konservatorin Uilliam Hague në postin e sekretarit të jashtëm dhe George Osborne në postin e Ministrit të Financave. “Ne po paraqesim politika të reja, ku interesi kombëtar është më i rëndësishëm se interesi partiak, ku bashkëpunimi fiton mbi konfrontimin, ku kompromisi, shkëmbimi, arsyeja, sjellja dhe pjekuria qytetare, nuk janë shenja dobësie por force”, tha Kameron.