Alarm te Real Madridi, Kaka ka hernie kronike

Dëmtimi

Një trajtim specifik të përditshëm, deri në fund të karrierës, në mënyrë që të evitojë ndalesa afatgjata. Ky është “mallkimi” i Rikardo Kakasë, për të luftuar dhe bashkëjetuar me hernien diskale. E përditshmja spanjolle “Marca”, ka hedhur alarmin, duke bërë të ditur se ky është shndërruar në një problem kronik për yllin e Realit të Madridit. Gazeta theksonte sesi mesfushori brazilian, sapo u kthye nga një dëmtim i gjatë është detyruar të stërvitet gjysmë orë më shumë se lojtarët e tjerë “merengue”, me synimin që të përforcojë muskujt e poshtëm të barkut dhe ato në pjesën e sipërme të kofshëve. Kjo është arsyeja përse rendimenti i Kakasë, pas transferimit nga Milani te Reali nuk ka qenë në nivelet e pritura. 28-vjeçari evitoi ndërhyrjen kirurgjikale dhe u vendos që ai të ndiqte një kurë më “konservatore”, edhe pse ajo nuk duket se është zgjidhja ideale e problemit. Megjithatë, stafi mjekësor në klubit madrilen është shprehur i sigurt se “lojtari brazilian do të rikthehet në formën e mëparshme, për të qenë një element i rëndësishëm i Realit”.

#