Alarmi, RENEA "blindon" Lul Berishën

 
Kreu i bandës së Durrësit është dërguar nën masa të rrepta sigurie në Gjykatën e Krimeve të Rënda
 
TIRANË- Forcat speciale të RENEA-s, si asnjëherë më parë shoqërojnë nga dera e hekurt e paraburgimit "Mine Peza" deri tek salla e gjyqit, kreun e bandës së Durrësit, Lulëzim Berisha. Sipas burimeve pranë Ministrisë së Brendshme thuhet se shkaku i shoqërimit të Berishës me forca të larta të sigurisë është bërë për të ruajtur dhe evituar çdo mundësi atentati të mundshëm ndaj tij nga rivalët e përbetuar, drejtuesit e të cilit ndodhen në një burg me të. Ka qenë ora 9:15 minuta e paradites së djeshme, kur dy blinda të forcave të RENEA-s, të shoqëruar nga dy fouristrada kanë pritur tek dera e paraburgimit furgonin e Drejtorisë së Përgjithshme të Burgjeve. Mësohet se me të dalë nga dera furgoni me të pandehurin Berisha, futur në kafaz brenda ambienteve të makinës, blindat e RENEA-s e kanë futur atë në mes, duke e shoqëruar deri në gjykatë dhe pas mbarimit të seancës është përsëritur e njëjta skemë. Edhe vetë punonjësit e burgjeve kanë mbetur të habitur, kur kanë parë se shoqëruesit e furgonit të tyre janë trupat speciale të RENEA-s, të cilët luajtën rolin e eskortës, gjë që ndodh vetëm në raste të mëdha rreziku.Ndërkohë, seanca gjyqësore e ditës së djeshme nuk u zhvillua për shkak të mungesës së një prej avokatëve të 17 të pandehurve në këtë proces. Seanca u shty për javën tjetër, duke urdhëruar sërish forcat e policisë së burgjeve të shoqërojnë të pandehurin Lulëzim Berisha në gjykatë. Mbi këtë të fundit dhe 16 anëtarët e tjerë të kësaj organizate, të ndarë në dysh rëndojnë një lumë akuzash të konsumuara nga ata. Akuzat kapin krime të rënda si vrasje, plagosje, rrëmbime dhe atentate.