Albpetrol, Berisha: Privatizim i plotë, rrisim efiçencën

Godina e Albpetrol

TIRANE- Kreu i qeverisë Sali Berisha duke folur në mbledhjen e qeverisë tha se, me privatizimin e Albpetrol qeveria e tij kërkon të rrisë efiçencën e përdorimit të burimeve energjitike të vendit.

Ai tha se, është në interesin më të mirë të vendit menaxhimi më efiçent,  si i burimeve ekzistuese ashtu edhe i kerkimeve te reja.

E vërteta është se zhvillimet  e 5-6 viteve të fundit në fushën e hidrokarbureve kanë dëshmuar se Shqipëria është një vend i lakmueshëm në këtë fushë.  Disponojmë fushën Patos- Marinëz. Në këtë fushë Bankers Petroleum përllogarit të ketë 6 miliardë fuçi naftë bruto, e cila me metoda parësore dhe dytësore mund të arrijë gjer në 50 milionë ton.- tha kryeministri.

Duke mbetur tek e njëjta çështje, kreu i qeverisë u tha ministrave se kërkimet vazhdojnë, pasi të dhëna optimiste ekzistojnë në zona të tjera, Delvinë, Jon, Adriatik, rrezë Shpiragut, por ka interes dhe për Alpet dhe zonën e veriut.

Duke iu referuar votës kundër të opozitës në parlament për privatizimin e Albpetrol, Berisha theksoi se Opozita e kundërshtoi ligjin pa asnjë argument, zero argument, duke shtuar se ata votuan kundër një marrëveshje që kishin firmosur vetë ata.

Më tej kryeministri, tha se, pivatizimi është gjithashtu  rruga më e sigurtë për të goditur korrupsionin.