Analiza/Rruga e vetme e Ramës, kushtëzimi i integrimit

Nëpërmjet një deklarate për shtyp, kreu i Partisë Socialiste, Edi Rama tha se deputetët e partisë Socialiste i kanë “duart e pastra” dhe nuk kanë frikë nga heqja e imunitetit. Ndërkohë deputetët e PS-së që “nuk kanë frikë” nga heqja e imunitetit vijojnë t’i mbajnë duart në xhep dhe kanë deklaruar se nuk do të shtypin butoni jeshil në seancën e fundit plenare të datës 6 gusht. Kreu i PS- thotë se ka një vizion të qartë, por nuk jep shpjegime për qëndrimin e fundit refraktar që mund të bllokojë marrjen e statusit të vendit kandidat.
Megjithatë shprehet me fjalë se PS-ja nuk është kundër integrimit, por me vepra dhe mosveprim në kohë për realizimin e kësaj reforme dëften të kundërtën e asaj që thotë. “Shqiptarët dhe ndërkombëtarët, thotë kreu i opozitës, janë dëshmitarë  të asaj që kemi bërë për të sjellë në gjendje normale drafte skandaloze të qeverisë”.
Deklarata e Edi Ramës erdhi ndërkohë që Këshilli i Legjislacionit në parlament po zhvillonte një seancë dëgjimore me ekspertë të huaj dhe vendas për imunitetin. Ekspertët ligjorë europianë, ndërsa vlerësuan dy nismat e paraqitura, rekomanduan votimin pa vonesë të draftit për heqjen e imunitetit të deputetëve dhe zyrtarëve.  PACA dhe Euralius vunë në dukje se projekti i paraqitur nga PD ofron më pak mbrojtje imunitare për deputetët se sa ai i socialistëve.
Ky fakt zbulon pandershmërinë e fjalëve të kreut të opozitës, i cili e ka të vështirë të japë sqarime “pse” po ndalon një reformë që mund të pengojë integrimin e Shqipërisë. Prandaj shprehja se “draftet skandaloze” janë të qeverisë, siç i quan Rama, janë në të vërtetë produkt i punës së misioneve të komunitetit europian Paca dhe Euralius.  
Gjithashtu Rama propozon muajin shtator për ndërhyrjen në 6 kapitujt të Kushtetutës për të vënë në punë drejtësisë, rikthimin e votimeve të kryeprokurorit të Republikës dhe anëtarëve të gjykatës së Lartë me 84 vota, kur kreu i sistemit të drejtësisë Presidenti i Republikës pas ndërhyrjes konsensuale në Kushtetutë në 2008, mund të zgjidhet pas raundit të tretë me 70+1 vota. Kjo do të thotë heqjen e kompetencave presidentit të Republikës ose  kthimin në “pazar” të prokurorëve dhe gjykatësve të Lartë.
Sido që të jetë qëndrimi i ditëve në vijim i partisë Socialiste ajo po humb shumë besueshmëri në sytë e qytetarëve dhe ndërkombëtare.
Qytetarët e kanë të vështirë të kuptojnë akuzat e PS-së kur ajo nuk shoqërohet me votimin “pro” të heqjes së imunitetit kryeministrit, parlamentarëve, gjyqtarëve dhe zyrtarëve të lartë të Shtetit. Ndërkombëtarët po ashtu e kanë të vështirë të kuptojnë sjelljen antireformë  të opozitës, e cila duhet të ketë interes të bashkëpunojë dhe të përmirësojë rritjen e transparencës dhe nxitjen e luftës kundër korrupsionit. Beteja antikorrupsion i opozitës është zgërlaqur për shkak të konfliktit të interesit që kanë disa deputetë me drejtësinë dhe përdorin imunitetit parlamentar si mburojë të punëve jo fort të ndershme.
Në 7 vite opozite s’ka mund t’i heqë njollën e korrupsionit partisë Socialiste, e cila mbron imunitetit parlamentar sikur të ishte në qeveri. Asnjë opozitë normale në botë e aq më shumë një parti e majtë nuk do të dilte kundër “zhveshjes” së zyrtarëve nga një privilegj kushtetues, përkundrazi, do të lufton me të gjitha mjetet parlamentare për të barazuar qytetarët përballë detyrimeve.