Angels and Demons premierë në Tiranë

Vetëm pak ditë pas premierës botërore, filmi Angels and Demons mbërrin edhe në Tiranë. Është pikërisht kinema Millennium që ka blerë të drejtën e shfaqjes së këtij filmi për publikun shqiptar dhe do ta sjellë atë në një premierë të veçantë me shumë të ftuar në datën 21 maj. Përshtatja kinematografike e librit me të njëjtin titull të shkrimtarit Dan Broën, është konsideruar një vijim i filmit The Da Vinci Code të shfaqur në vitin 2006 po në kinema Millennium. Mes dy filmave ka shumë pika të tjera të përbashkëta. Kështu profesori i famshëm Robert Langdon është sërish aktori hollivudian Tom Hanks. Edhe Angels & Demons ashtu si The Da Vinci Code është një vepër e regjisorit Ron Hoëard, i cili ka premtuar se do të marrë përsipër edhe regjinë e një filmi të tretë bazuar në romanin më të ri që Dan Broën përgatitet të sjellë në shtator të këtij viti. I njëjtë është edhe skenaristi, që në të dy filmat mban firmën e Akiva Goldsman, të njohur si autor i shumë skripteve ndër të cilët Beautiful Mind. Edhe kolona zanore është firmuar sërish nga një kompozitor mit i Hollivudit siç është Hans Zimmer. Ngjarjet e filmit sillen rreth profesorit  Langdon, i cili duhet të zbulojë se çfarë fshihet pas një vrasjeje misterioze dhe të parandalojë një atentat me bombë në zemër të Vatikanit. Filmi pati një premierë italiane të suksesshme më 5 maj, ndërsa premiera amerikane është mbajtur më 15 maj. Fundjava e parë e filmit në kinema e ka renditur në vendin e parë të arkëtimeve me 48 milionë dollarë duke krijuar që në fillim përshtypjen e një filmi po aq të ndjekur sa dhe The Da Vinci Code, i cili në total kaloi shumën prej 217 milionë dollarësh.. Ndërkohë dita- ditës Angels & Demons është duke zgjeruar gjeografinë e projeksioneve të tij në të gjitha kinematë e botës dhe brenda datës 23 maj do të ketë konsumuar pothuajse të gjitha premierat e tij më të rëndësishme. Por aktiviteti i organizuar nga Millennium do të sjellë edhe një surprizë për lexuesit. Shtëpia Botuese Dudaj e cila ka ekskluzivitetin e librave të Dan Brown, do të prezantojë në premierë,  botimin e ri të Engjëj dhe djaj, këtë herë me posterin e filmit për kopertinë.