Anijet amerikane nisen në drejtim të Libisë

Bashkësia ndërkombëtare është duke ushtruar vazhdimisht trysni ndaj udhëheqësit të Libisë, Muammar Gaddafi, për shkak të veprimeve të tij brutale kundër opozitës.

Një zëdhënës i qeverisë në Washington njoftoi se anijet luftarake amerikane janë vendosur afër bregdetit libian.

Kjo është bërë kryesisht për t`i dhënë ndihmë popullsisë civile në nevojë.

Sekretarja amerikane e shtetit, Hillary Clinton, theksoi se nuk pritet ndonjë sulm ushtarak.

Në Gjenevë Clintoni foli me homologët e saj evropianë për mundësitë e krijimit të zonave të ndalim fluturimit mbi hapësirën ajrore të Libisë dhe për të parandaluar sulmet ajrore të regjimit ndaj kryengritësve.

Ministri i Jashtëm gjerman, Guido Westerwelle, foli për një masë që do të merret parasysh. Në kuadër të sanksioneve kundër Libisë, SHBA ngriu 30 miliardë dollarë të qeverisë së vendit afrikano-verior.

Pas SHBA-së dhe Kombeve të Bashkuara edhe Bashkimi Evropian vendosën po ashtu për sanksione kundër Gadddafit dhe 25 personave besnikë.

Atyre u ndalohet udhëtimi në vendet e BE-së si dhe u janë bllokuar numrat e llogarisë që kanë në Evropë. Përveç kësaj ndaj Libisë është vendosur embargo në armatim.

Në anën tjetër, presidenti amerikan Barack Obama dhe Sekretari i Përgjithshëm i OKB-së, Ban Ki-Moon u takuan në Shtëpinë e Bardhë, me ç’rast biseduan për situatën në Libi.