Armë me postë nga Holanda, një në pranga në Elbasan

ELBASAN- Trafiku i armëve nga vendet e tjera të Europës drejt Shqipërisë ka krijuar një linjë të re që përfshin shërbimin postar. Një pako me pistoleta është zbuluar tre ditë më parë sapo ka hyrë në postën shqiptare nga Holanda ndërsa dje policia ka arritur që të prangosë pritësin e tyre. Agim Shëngjoni nga Elbasani është arrestuar dje në flagrancë së bashku me pistoletat që kishte marrë me postë. Ai është lejuar të marrë tre pistoletat dhe në këtë moment, agjentët e shumtë të policisë, nën urdhrat e Prokurorisë për Krimet e Rënda, janë hedhur në veprim duke e arrestuar.

Burimet e grupit hetimor pohuan dje se përmbajtja eporosisë duket se është zbuluar sapo ka hyrë në kufi por gjithçka është lejuar të vazhdojë deri në mbërritjen e tërheqësit të pakos. Ky i fundit, banor i lagjes Kala të qytetit të Elbasanit, është gjetur i rrethuar nga shumë efektiva policie në postën e Elbasanit. Pasi është neutralizuar Agim Shëngjoni, në drejtim të shtëpisë së tij janë nisur një grup i efektivave speciale. Kontrolli në banesën e tij në rrugën “Konstandin Kristoforidhi” nuk kanë sjellë asgjë të re. Në shtëpi nuk janë gjetur elementë që e implikojnë më tej marrësin e pakos me tre pistoleta. Ende nuk është mësuar se çfarë do të bëhej me tre armët e trafikuara por si destinacioni i parë i tyre mendohet shitja. Ndërkohë, hetuesit nuk kanë hedhur poshtë idenë që armët mund të përdoren në ndonjë vepër penale.

Ata pohuan se zbulimi i bërë në aeroport i tre pistoletave nuk është dekonspiruar. Gjithçka ka vazhduar derisa pakoja ka mbërritur në destinacion tek pritësi i saj, i cili nuk do ta besonte se ishte i rrethuar dhe pritej vetëm tërheqja pranë sporteleve të postës së Elbasanit. Në çastin që shtetasi do ta haptepakon kanë ndërhyrë strukturat e specializuara të ardhura nga Tirana. Në pako janë gjetur tre pistoleta të cilat janë sekuestruar në cilësinëe provës materiale. I arrestuari është transportuar menjëherë në Tiranë ku edhe është marrë në pyetje nga organe të specializuara në fushën e trafikut. Drejtori i Policisë së Elbasanit, Arben Hyseni, konfirmoi se pakoja mbante emrin e një shtetasi me banim në lagjen Kala në Elbasan dhe efektivat e Elbasanit kanë përkrahur dhe ndihmuar operacionin. Operacioniështë kryer nga struktura të posaçme të Ministrisë së Brendshme dhe se policia e Elbasanit ka luajtur rolin e saj në luftën kundër trafikut të armëve. Në polici kanë përfunduar edhe dy persona të tjerë, të njohur të Agim Shëngjonit. Ata janë mbajtur në ambientet e policisë deri në sqarimin e plotë të pozicionit në këtë ngjarje. Ndërkohë, tre pistoletat e kapura janë dërguar për ekspertizë në laboratorin qendror të kriminalistikës.