Arratisja, i dënuari shqiptar rrëmbëhet nga duart e gardianëve

Greqi- Të burgosurit shqiptarë shënojnë një tjetër rekord arratisjesh. Një i dënuar me 20 vjet burg është rrëmbyer prej personave të panjohur në qytetin Nafplio të Greqisë.

Ngjarja e pazakontë ndodhi rreth orës 11:00 të paradites të së hënës në oborrin e spitalit të këtij qyteti, në kohën kur 40-vjeçari shqiptar, identiteti  i të cilit nuk bëhet i ditur, po dërgohej për kurim.

Policia thotë se dy persona të cilët mbanin në duar kallashnikovë kërcënuan gardianët dhe nën kërcënimin e armëve morën me forcë të dënuarin. Shqiptari rezulton të jetë i  dënuar me 20 vjet heqje lirie për grabitje me armë.

Sipas policisë, ende nuk është e qartë nëse rasti konsiderohet arratisje apo pengmarrje, pasi sipas gardianëve 40-vjeçari u mor me dhunë nga personat e panjohur.

Forca të shumta policie kanë filluar një operacion për gjetjen e të dyshuarve, të cilët sipas dëshmitarëve janë larguar në bordin e një Audi në drejtim të pa ditur. Nëse bëhet fjalë për rrëmbim personi atëherë ky do të jetë rasti i parë në Europe ku një i dënuar sekuestrohet prej keqbërësve në shoqërinë e policëve të armatosur.

/IDEA/