Arrestohet drejtuesja e mjetit, aksidentoi të moshuarën

Elbasan - Policia e Elbasanit ka arrestuar dje drejtuesen e një mjeti, pasi është identifikuar si autore i një aksidenti me pasojë plagosjen e një 70-vjeçareje. Burime të policisë lokale bënë të ditur për gazetën se “Albana Balla, drejtuese e mjetit tip ‘Fiat Punto’, me targë BJ 802 JV, ka aksidentuar një ditë më parë kalimtaren e moshuar Maqe Buzo, lindur e banuese në lagjen ‘Partizani’ në Elbasan”. Aktualisht 70-vjeçarja ndodhet e shtruar në Spitalin kirurgjik të Elbasanit në gjendje të rëndë për jetën. Drejtuesja e mjetit u arrestua pasi akuzohet për veprën penale të “shkeljes së rregullave të qarkullimit rrugor”.

Aksidenti në aksin rrugor Shkodër-Lezhë, plagoset motoçiklisti

Shkodër - Një aksident i ndodhur dje rreth orës 06:00, në aksin rrugor Shkodër-Lezhë, në vendin e quajtur “Bahçallëk”, Shkodër, ka bërë që drejtuesi i një motoçiklete tip “Lifan” pa targa, të plagoset rëndë. Xhevahir K., 28 vjeç, lindur e banues ne fshatin Barbullush të Shkodrës, si rezultat i humbjes së kontrollit, është përplasur me tirantin mbajtës të shtyllës telefonike. Sipas burimeve policore, i aksidentuari është dërguar menjëherë në Spitalin rajonal Shkodër, ku pasi ka marrë ndihmën e parë mjekësore në këtë spital, është dërguar në spitalin “Nënë Tereza” Tiranë, ku aktualisht ndodhet jashtë rrezikut për jetën. Ndërkohë L. K., 32 vjeçe, lindur e banuese po në fshatin Barbullush, e cila udhëtonte si pasagjere me motoçikletën e lartpërmendur, nuk ka pësuar asnjë dëmtim. Në vendin e ngjarjes ka mbërritur menjëherë grupi hetimor, i cili ka kryer veprimet e duhura procedurale dhe hetimore, si dhe materialet ne ngarkim të Xhevahir K. i kaluan Prokurorisë së Rrethit Gjyqësor Shkodër. Ai do të gjykohet në gjendje të lirë për veprën penale të “drejtimit të mjetit pa dëshmi aftësie”.

13 Qershor 2009