Asnjë ofertë nga kompanitë shqiptare për Telekomin. Dje, në orën 18.00 skadoi afati.

04/12/2004  Asnjë ofertë shqiptare për privatizimin e Telekomit. Dje ishte “dead line” zyrtar për shpalljen e emrave që kanë shfaqur interes për Telekomin. Por lajmi i dhënë nga drejtori Noti është kthyer mbrapsht nga Ministria e Ekonomisë. Burime nga kjo e fundit konfirmojnë vetëm se janë të paktën tetë konkurrentë që kanë shfaqur interes për kompaninë më të madhe dhe të vetme që ofron shërbimin e telefonisë fikse në Shqipëri. Dy nga këto kanë dashur të shtyjnë edhe për dy ditë shfaqjen e interesit. Në emrat amerikanë dhe evropianë të kërkesave për Telekomin, nuk figuron asnjë ofertë shqiptare. Kështu, kërkesa e biznesmenëve shqiptarë për të qenë pjesë e Telekomit, nuk ka fort gjasa të bëhet realitet. Procesi i privatizimit të Telekomit ka filluar që në janarin e 2001-shit. Privatizimi i gjigantit shqiptar ka qenë shpesh edhe “mollë sherri” për politikën shqiptare. Shitja e Telekomit u përfol edhe si arsyeja kryesore e ndarjes politike të Partisë Socialiste. Megjithatë, qeveritë socialiste e kanë “dështuar” disa herë privatizimin e Telekomit. Duket e çuditshme që kompania, edhe pse ndërkombëtarët e kanë cilësuar tregun si të papërshtatshëm për privatizime, ka shfaqur interes në këtë fundviti. Privatizimi i Telekomit është parashikuar të përfundojë me ngulm brenda janarit të vitit 2005, vit që koençidon me zgjedhjet e përgjithshme parlmentare. Paratë e privatizimit të Telekomit janë parashikuar të shkojnë për investime publike, gjë që mund të përdoret edhe si një “qeverisje e mirë” nga partia në pushtet për fushatën elektorale. Sidoqoftë, Telekomi është parashikuar të shitet me një çmim që varion te 80 milionë euro. Kësaj vlere i duhet shtuar edhe vlera e 20 milionë eurove, që është çmimi i liçensës së tretë të celularëve. Shumë prej specialistëve, duke përjashtuar arsyet politike, e shohin zgjidhjen e problemit të shitjes së Telekomit, pikërisht nga bashkimi i “Eagle Mobile”. Kjo do të duhet të konkurrojë AMC-në dhe Vodafone, ndërsa Telekomi, i vetëm në treg, nuk arrin të sigurojë klientë as sa Maqedonia fqinje, me 2 milionë banorë. Në kushte të tilla, duket se aseteve të Telekomit nuk i është shtuar „Eagle Mobile“, por kjo e fundit do të shesë edhe Telekomin. Fakti që për më shumë se 3 vjet nuk ka asnjë ofertë për Telekomin, dhe brenda gjashtë muajsh pas bashkimit të liçensës së tretë me asetet e Telekomit kanë ardhur rreth tetë oferta për privatizim, që do të thotë se Telekomi është ekonomikisht një kompani që nuk josh investitorë.

Fitimet e AMC dhe Vodafone arrijnë në disa qindra milionë dollarë në vit. Ndërhyrja në treg e një kompanie të tretë, sigurisht që do të merrte pjesë nga ky fitim. Aq më tepër që tarifat e “Eagle Mobile” janë parashikuar të jenë shumë më të ulëta se ato të dy kompanive të tjera. Për të bërë sa më të sigurtë rritjen e konkurrencës në ligjin e privatizimit të Telekomit është parashikuar që kompanitë konkurrente të mos jenë nga i njëjti shtet i atyre ekzistuse, pra jo nga Greqia. Megjithë procesin e privatizimit, që do të jetë ose jo i suksesshëm, një gjë është e sigurtë. Në janar, shqiptarëve u është premtuar se do të fillojë nga puna “Eagle Mobile”. Kjo do të thotë se do të kemi mundësi të zgjedhim mes tre kompanive, 068, 069 dhe 067.