“Asnjë pacient në spital pa rekomandim”

 

Asnjë pacient nuk do të paraqitet në spital, nëse nuk ka rekomandim nga mjeku i familjes. Ministri i Shëndetësisë Petrit Vasili deklaroi dje se reforma në shëndetësi synon të orientojë pacientët në mënyrë që të marrin një shërbim më cilësor dhe më të lirë. Këtë duke mos e përqendruar atë vetëm në spitale, por edhe në poliklinikat e lagjeve. Gjithçka u bë me dije gjatë konferencës “Mbrojtja social-shëndetësore” e organizuar nga Instituti i Sigurimeve të Kujdesit Shëndetësor (ISKSH) dhe Bashkëpunimi Teknik Gjerman (GTZ). “Natyrisht sfida kryesore dhe qëllimi final i të gjithë përpjekjeve të përbashkëta duhet të mbetet ofrimi i shërbimeve të aksesueshme cilësore, duke futur këtu të gjitha masat politike, institucionale, organizative e strukturore, jo vetëm duke zgjeruar mbulimin e skemës së sigurimeve, por duke i dhënë një kosto reale, për shërbime reale”, tha Vasili. Ndërsa drejtoresha e Institutit të Kujdesit Shëndetësor, Elvana Hana paralajmëroi se për ato spitale që do të pranojnë pacientë pa rekomandime do të ketë masa ndëshkimore, çka i rrezikon atyre përfitimet nga ISKSH. “Ne jemi në një proces që po përmbyllim depistimin e personave në të gjithë republikën, në mënyrë që të dihet se cili mjek është përgjegjës për cilët persona, duke lejuar dhe zgjedhjen e lirë të mjekut. Në përmbyllje të këtij procesi patjetër që presim që mjeku i familjes të përzgjidhet gjithnjë e më shumë”, tha Hana. Sakaq ministri i Shëndetësisë, Petrit Vasili raportoi dje edhe në komisionin parlamentar për reformat e pritshme në shëndetësi. Një pikë e fortë do të jetë dhe tregu farmaceutik përfshirë rritjen e cilësisë së barnave. “Një objektiv që ne kemi vënë dhe do ta realizojmë pa diskutim dhe është i domosdoshëm, tashmë i munguar prej kohësh, është ngritja e strukturave të farmakovigjilencës. Do të thotë ç’ndodh në tregun farmaceutik realisht. Jo thjesht dhe vetëm që a është një kuti e paregjistruar në farmacitë tona, po dhe ato barna tashme të regjistruara, a kanë të njëjtën cilësi edhe pas regjistrimit”, tha Vasili. Ministri ka paralajmëruar kontrolle intensive dhe të herëpashershme në spitale, në kuadër të luftës kundër korrupsionit.