Atentat ndaj Mourinhos, plagoset truproja

Njëri prej truprojave të trajnerit të Real Madridit, Jose Mourinho ishte therur në aeroportin Alvedro në La Coruna, javën e kaluar.

Lajmin e ka bërë të ditur radiostacioni Cadena Ser. Përgjegjësi i sigurisë së strategut portugez është qëlluar me një armë të mprehtë duke i shkaktuar një plagë në dorë prej katër centimetrave.

Caku besohej se ishte Mourinho. Incidenti ndodhi të premten e kaluar, kur Reali zbriti në La Coruna.

Në pritje u kishin dalë shumë tifozë. Mourinho u ndal për të nënshkruar disa autografe dhe truproja ishte afër tij.

Kamerat e aeroportit i kanë ndihmuar policisë të identifikojë përgjegjësin. Klubi ka vendosur të mos e bëjë publik lajmin për të përhapur panik, por ka përforcuar masat e sigurisë për të mbrojtur ekipin dhe trajnerin.