Autoriteti i Konkurrencës dhe Tatimet, kontroll për çmimin e naftës

Një task-force speciale, e përbërë nga specialistë të Inspektoratit Qendror të Naftës dhe Gazit, Autoritetit të Konkurrencës dhe Policisë Tatimore, kanë ushtruar kontrolle në pikat e tregtimit të karburanteve në kryeqytet. Qëllimi i kontrollit ishte që të vëzhgonin dhe konstatonin çmimin me të cilin po tregtohet aktualisht nafta për litër. Po kështu, autoritetet tatimore kanë pasur për qëllim edhe konstatimin e dhënies së kuponit tatimor nga kasa për çdo klient që furnizonte makinën e tij me karburant në pikat e shitjes me pakicë (distributorët). Për të mbajtur çmimet e tregtimit të karburanteve me pakicë në një vëzhgim konstant dhe për të mos toleruar më spekulimet, qeveria ka nxjerrë edhe udhëzime të posaçme për grosistët dhe tregtarët.
Udhëzimi i ri sanksionon që shitësit me pakicë të konsiderohen “nënfurnitorë shërbimi” për kompanitë e tregtimit me shumicë të hidrokarbureve dhe të naftës. Me këtë tagër Tatimet do të llogarisin TVSH-në 20 për qind mbi çmimin final të shitjes së produktit dhe jo mbi çmimin e shumicës. Kjo skemë është zbatuar sakaq te cigaret dhe ka sjellë rritje çmimesh nga 10 në 30 lekë në tregun me pakicë, si dhe një rritje të çmimeve të shumicës nga 4 në 10 lekë për paketë. Te nafta, ku çmimet janë më fleksibël, udhëzimi i ri i ngarkon shqiptarët me 2-3 lekë taksa më shumë. Shumë shpesh media dhe qytetarët akuzojnë grosistët e naftës për çmime spekulative. Edhe Autoriteti i Konkurrencës ka hapur një hetim mbi Shoqatën e Hidrokarbureve, pas informacioneve se kjo shoqatë shërben edhe si një zyrë për koordinimin e grosistëve në përcaktimin e çmimeve. Çmimi i naftës në Shqipëri është ulur me vetëm 5-6 për qind gjatë muajit të fundit, në një kohë që në tregun ndërkombëtar çmimet kanë rënë me më shumë se 40 për qind.

19 Shtator 2008