BSH, zgjerohen investimet në kredi dhe letra me vlerë
Sektori bankar ka zgjeruar më tej investimet në kredi dhe letra me vlerë. Sipas raportit më të fundit të BSH-së, në fund të vitit 2007, portofoli i kredive të sektorit bankar arriti në pothuaj 40 për qind të totalit të aktiveve të sektorit, duke shënuar një rritje me 4.4 pikë përqindje në krahasim me fundin e muajit qershor. Ndërsa investimet në letra me vlerë arritën në 18 për qind të totalit të aktiveve, duke u rritur me 1.6 pikë përqindje në krahasim me të njëjtën periudhë. Në fund të vitit 2007, kthimi nga investimi i aktiveve mesatare rezultoi 1.6 për qind, ndërsa kthimi nga investimi mbi kapitalin aksionar rezultoi 20.7 për qind, pranë niveleve të shënuara në fund të vitit 2006. BSH-ja bën të ditur se cilësia e kreditimit, ndonëse është ndikuar negativisht nga ritmi i lartë i kreditimit që dikton konkurrenca në treg, ka ndryshuar pak në krahasim me fundin e muajit qershor 2007 dhe konsiderohet e mirë.
Rritja e çmimeve, qytetarët shpenzojnë pak në Ditën e Verës
Rritja e çmimeve të produkteve ushqimore nuk u ka dhënë mundësinë shumë familjeve shqiptare që me rastin e Ditës së Verës të kishin edhe një drekë të bollshme, ndryshe nga ditët e zakonshme. Shtrenjtimi i fruta-perimeve ka frenuar blerjet edhe në këtë ditë feste, ashtu siç po ndodh rëndom gjatë muajve të fundit. Rënia e xhiros për shkak të çmimeve të larta pranohet edhe nga tregtarët. Sipas tyre, çmimet varen nga importi, pasi aktualisht tregu furnizohet vetëm me produkte të huaja. Rritja e çmimeve të produkteve ushqimore ka nisur që në gusht të vitit të kaluar. Shtrenjtësimi i tyre ka rritur koston e jetesës në vend, duke rënduar direkt buxhetin e familjeve shqiptare.
15 Mars 2008